A tene reunion cu team cu a logra stabilidad financiero pa Aruba

Ministro Maduro ta satisfecho

ORANJESTAD (AAN): Na forma regular Minister Maduro di Finansa ta reuni cu e departamentonan cu ta resorta bao Ministerio di Finansa y Cultura. Asina siman pasa e mandatario a reuni cu Departamento di Finansa pa asina por repasa e trabaonan cu ta sigui den aña 2024 pa por trece stabilidad financiero pa Aruba.

   E ultimo añanan Minister Maduro a traha hopi di cerca cu e ekipo di Departamento di Finansa pa asina por logra sobrepasa e reto financiero cu e pandemia a hinca nos Pais aden. Banda di esaki e ekipo aki tin algun logronan importante cu ta keda registra den historia di Aruba.

   Por ehempel, den corto tempo a logra pa por bay di presupuestonan cu deficit grandi pa presupuestonan cu un surplus mas grandi cu 1% di nos GDP. Importante tambe ta e hecho cu e ekipo aki a logra entrega ya pa dos aña tras di otro, presupuesto na ora y realistico cu ta cumpli cu normanan financiero acorda. E trabao den ekipo a logra pa brinda mas transparencia financiero den raportahenan financiero existente y nobo cu ta worde publica na un manera regular.

   E esfuerso grandi di e ekipo di Departamento di Finansa a yuda tambe pa nos Pais por a recobra e credibilidad financiero cu ta duna inversionista e confianza den Aruba.

   Minister Maduro ta enfatisa, cu ainda tin mas trabao pa worde haci pa Aruba por ta stabil financieramente. E mandatario ta splica cu, entre otro, ta trahando awo pa fortifica e columna financiero pa por sigura cifranan confiabel y procedura eficiente. Ta trahando riba e reto pa baha y haci e debe di Pais Aruba pagabel den e tempo nos dilanti. Ta haci tur esfuerso pa mantene y hisa e credibilidad financiero di Aruba cerca companianan di rating, ya cu esaki ta un prioridad pa nos Pais.

   Tambe ta keda den contacto continuo cu IMF, WorldBank y CARTAC pa e asistencia tecnico necesario pa capacita nos expertonan y hiba acabo cambionan cu ta fortifica Aruba su economia y finansa. Por ultimo e mandatario ta enfatisa cu lo dedica na presenta Aruba su forza di resiliencia na inversionistnan local y internacional riba e mercado internacional di capital.

   “Ta trabaonan grandi cu lo exigi hopi di e personal di Departamento di Finansa, pero nos tin pleno confianza cu e trabao den ekipo lo sigui brinda su fruto y lo yuda pa logra e stabilidad financiero cu tur hende ta desea pa Aruba,” Minister Maduro a expresa.