Michelle Croes-Matos, mama di Zinnia:
*Su gratitud pa henter e team di FADA y Amigo Didi
ORANJESTAD (AAN)—Michelle Croes-Matos, di Fundacion Zinnia a recorda cu e fundacion a lanta despues cu na 2015 su yiu Zinnia, a wordo atropeya door di un chauffeur cu tabata bao influencia di alcohol, algo hopi malo cu e famia a pasa aden y pa e morto di Zinnia no ta en vano a pensa kico nan por haci pa algo bon.
“Y asina Fundacion Zinnia a Lanta y pa wanta e memoria di Zinnia bibo tambe. Mi tin cu bisa cu mas y mas aña pasa enberdad e hendenan ta birando un tiki mas conciente, pero e no ta un trabao cu bo ta haci di awe pa otro mañan.
E ta un trabao hopi grandi cu nunca ta bay caba, pero si mi tin cu bisa na e pueblo di Aruba cu e mensahe ta yegando eyfo y nos ta para cu hopi accidente di auto ainda, pues nos tin hopi mas trabao pa haci, pero si nos ta sinti cu for di e aña cu Zinnia a fayece, y cu Amigo Didi a lanta hunto cu FADA, nos a bin ta concientizando pueblo di e consecuencianan y nos ta wak un cambio, pero e ta bay hopi poco poco; e cambio tey y tin algo diferente cu diez aña pasa, sigur!” Michella Croes-Matos a comenta.
E dama a expresa cu e fundacion ta hopi gradici na FADA. “Tur hende sa cu nos no ta biba akinan, nos ta biba na Hulanda; danki Dios cu Fundacion Zinnia tin miembronan cu ta carga esey pa nos, unda cu semper nos por acerca nan. Y for di Hulanda, nos ta dirigi un tiki. Pero nos tin cu bisa cu FADA a carga esaki tambe como Amigo Didi y Fundacion Zinnia, y nos ta hopi gradici cu esaki”, Michelle Croes a subraya.
Como mensahe pa e comunidad pa e simannan cu falta di carnaval 70, Michelle Croes a expresa pa corda cu e consecuencianan di nos actonan ta keda pa henter bida y pa sea conciente di e decisionnan cu bo ta tuma. “Ta importante pa esaki no persigui bo y cu bo por biba cu bo consenshi. Esaki ta mas importante cu tur cos”, el a señala.
Finalmente el a expresa palabranan di gratitud pa e bureau di Minister Ursell Arends, cu a set in cuater bus pa hoben y adulto, un tours cu a pone un bus na disposicion di e fundacion tambe. Y sigur pa e team completo di Amigo Didi cu ta haci esaki posible.
