Esaki ta e testament di Momito cu hopi mensahe

ORANJESTAD (AAN): Diadomingo anochi despues cu Parada di Carnaval di Mucha na San Nicolas a yega su final,

a sigui cu evento den Aruba Carnival & Entertainment Village pa Kimamento di Momito.

   Prome cu esaki a socede, manera ta tradicion, Momito a laga un Testament atras tambe.  Aki DIARIO ta reproduci e testament pa lectornan:

   Testament di Momito: Muchanan y Mayornan e momento a yega pa mi por duna mi pensamento y laga atras mi testament Prome cu tur cos mi kier a felicita mi Mama - Machi Carnaval cu su 70 aña y bise cu no worry paso mi ta mira cu el’lo tey pa hopi tempo mas cu nos. Mi a mir’e ta goza y balia, m’a wak e yora y hari, te asta mi a bira jaloers ora cu hopi hende a braz’e pa e por lanta para y luci mas cu nunca e aña aki. Pabien Machi y Aruba completo.

   Despues di a drumi masha tiki ora den weekend aki, Machi a bisami cu mi mag di duna mi pensamento y yuda guia carnaval di nos muchanan. Awo como Rey di caminda mi ta cla pa duna mi testament infantil-/hubenil pa Carnaval 70.

   SMAC mi sa cu hunto nos traha pa sigui haci nos “Carnaval di Mucha” mas grandi ainda. Momito a sinta cu hopi hende pa papia di Carnaval di mucha, Momito a lesa hopi comentario pa por compronde kico tur hende ta desea y esaki ta mi conclucion.  Ata ki mi testament:

   (1) Momito a keda hopi contento cu carnaval di nos muchanan, mi a mira un parada yena cu fantasia y hopi luho y cu hopi mucha gozando.  Pa otro aña cu no ta un aña di celebracion grandi Momito kier mira mas scol y bario participa den parada di mucha pa asina No laga e gruponan bira menos. Mayornan, lidernan ban sigui yuda e gruponan y scolnan pa sigui engrandece paradanan di mucha.

   (2) Momito ta un poco tristo si, paso mi a mira hopi mucha hopi chikito den oranan di anochi laat riba caya. Momito ta desea pa por pone un centro di straf pa mayornan cu no tin horea y cu no ta mira e peliger cu tin den anochi laat cu nan yiuchinan riba caya. Korps chef mester pone algun di su special force atende cu esaki. Momito lo pidi SMAC pa yuda cu extra machine di swipe pa e multanan. Pero mayornan no bay paradanan di hende grandi cu nos muchanan bou di 8 aña.

   (3) Durante di paradanan di mucha tambe momito a mira hopi mucha ta yora paso nan no kier baila den parada y tabata haya zundra di nan mayornan. Momito ta hopi feliz cu mayornan kier haci momito orguyoso, pero no forsa nan. Laga nan bay paradanan chikito prome pa despues bin e fiesta grandi mes riba caya cu Momito y su amiguitonan.

   (4) Momito a goza hopi durante parada escolar y kier a bisa danki na e scolnan cu a participa y tambe na tur e bandanan cu a acompaña e scolnan. Mi ta desea di mira mas scol y tambe den paradanan grandi di mucha.

   (5) Durante parada Momito ta sigui mira muchanan bailando hopi cerca di speakernan y esey ta haci ami tristo atrobe, paso no ta tene cuenta cu e oido di nos muchanan. Aplauso pa e gruponan cu ta parti earplugs pa nan muchanan y tambe pa e mayornan cu ta cumpra nan earplugs pa e muchanan bisti ora nan ta para canto di caminda. Corda mantene bo mes 7 meter leu for di speaker y earplugs ta obligatorio.

  (6) Momito gusta hari paso e ta haci momito keda jong pero tambe mi kier mira mas participacion na eleccion di Prins y Pancho. Momito kier bay den tur e scolnan of clubnan deportivo den tur bario pa duna les di actuacion of di conta joke. SMAC mester pidi permiso pa por haya docentenan of ex-Prins y Panchonan pa yuda cu cursonan pa e muchanan. Momito ta desea pa pidi boso motiva nos muchanan. Prins y Pancho ta esnan cu tin e yabi y ta dirigi carnaval. E ta un figura importante. Mi no kier mira coronacion di dos pareha so pa otro aña, sino hopi pareha cu hopi premio bunita y cu respet pa tur categoria pa nos muchanan y hobennan.

   (7) Mi a hera muri dood ora cu mester a cuminsa eleccion di Reina infantil Hubenil hopi laat. Momito ta contento di mira mas Reina infantil y hubenil participando pero SMAC corda riba e pañanan di carnaval mas tempran. Momito lo pone su cosedonan “stand bye” pa Carnaval 71 y cu e machine di SWIPE si SMAC no cumpli.

   (8) Momito gusta con nos muchanan ta baila den paradanan di carnaval pero si mi kier a pidi mayornan y leidsternan pa no stroba e mironesnan cu kier mira e muchanan luci nan paña. Tin grupo cu asina hopi leidster of mayor cu ta baila riba e muchanan cu bo ta perde e fantasia for di bista. Group leader please controla esaki.

   (9) Momito a lesa y skucha hopi critica cu no ta laga nos muchanan canta den parada nan cancionan di Tumba of Roadmarch, Mi a mira cu den paradanan di mucha y escolar mas mucha a canta. Hopi contento pero please bandanan si por train of maske accepta e pista pa worde graba den studio pa asina nos muchanan por canta durante paradanan momito lo goza mas ainda di Carnaval. SMAC por pone esey como premio pa haci grabacion den studio. Y danki na tur banda cu a laga nan canta.

   (10) Pabien na ganadornan cu ta pone musica y ambiente den Carnaval, esta Tumba Infantil “B’a Flecha mi curason”, tambe Tumba Hubenil “Den nos Cos”, Calypso Infantil cu ta “Duna nos Amor”, tambe Calypso Hubenil “Giva thanks and Praise”.  E Roadmarch infantil “Colors”, y Roadmarch Hubenil “Arubian Sauce”.

   (11). Momito no ta lubida e conseho di nos prins y pancho infantil cu ta bisa :

Aruba, e aña aki nos kier pa tur hende uza e palabra “Danki”. Mescos cu nos ta bisa danki cu nos ta lanta tur mainta. Danki pa nos mami y nos papi. Danki pa nos juffrouw y meneer nan. Danki pa nos famia. Danki cu nos tin un cas y nos tin cuminda. Mami y papi, corda bisa nos danki, ora nos haci un fabor. Esey ta laga nos curason sinti bon. Momito tambe kier bisa danki na nos prins y panchonan y danki na nos reina infantil Xeena Dijkhoff y reina hubenil Jaylienne Tromp. Corda semper pa bisa Danki! Danki ARUBA pa nos Carnaval 70.

   (12). Tambe e mesnahe di nos Prins y Pancho Hubenil unda nan ta pidi pa hobennan keda demostra disciplina, keda semper uni, keda cu bo creencia spiritual, keda como hoben humilde y inspirativo. Yuda den ideanan inovativo y kere den bo mesun potencial y duna respet pa ricibi respet. Bo termina bo estudio mas cu tur cos y no benta bo hubentud afo. Corda cu bo exito no ta di bo so sino di bo mayornan, amigonan y henter bo pais.

   (13). Momito kier a sigui conseho di Prins y Pancho infantil y bisa “Gracias, thank you, van harte bedankt, graci’e, danke, xi’e xi’e, obrigado, masha danki mes mes”. Na tur nos muchanan y hobennan cu a yuda haci nos carnaval inolvidabel, tur cu a participa y tambe esnan cu a gana. Momito ta bay cu tur e cosnan malo cu por a pasa den nos carnaval aki, pero ta laga boso tur pa yuda otro pa mehora carnaval 71.

   Corda sigui representa Carnaval durante henter e aña , unda cu boso bay keda saca cara di nos nos muchanan y hobennan. Te despues mi amigonan Arnold, Jayven, Cayle, Edan, Xeena, Jaylienne , Ian, Jetzenia, J-Vyon, Zenae, y Ivy-Ann y tur gruponan participante... tur carnavalista infantil y hubenil. Danki pa boso presentacion

   Awo si mi ta cla pa boso kimami, y corda braza otro, stima otro, no bully, no kibra nos gana di carnaval, engrandece cu tur cos cu por y danki na tur e gruponan cu a haci nos carnaval di mucha grandi y bunita... te otro aña. Ta despedi Momito Rey di carnaval infantil di Aruba.