Hendrik Tevreden encuanto cuentanan anual atrasa:
*Gobierno ta haciendo su trabao pa keda cla mas pronto posibel
ORANJESTAD (AAN) -- Parlamentario Hendrik Tevreden, di fraccion di MEP, a bisa den conferencia di prensa cu otro punto importante cu su fraccion lo trata prome cu sali pa e Tripartite y pa IPKO, cu ta nan dilanti na habrimento di aña 2024, ta cu nan a haci e peticion, mirando cu e fraccion a sinta cu Algemene Rekenkamer, pa atende cu e cuentanan anual.
“Esey, pasobra nos ta kere cu ta importante pa e ciclo presupuestario di un pais mester ta completo y ora cu nos bay na mesa cu Hulanda, nos no kier pa esaki ta un punto di discusion. Nos no kier pa tin reclamo riba e puntonan cu nos lo trece dilanti den IPKO y pesey nos a scoge pa nos mes ta pro-activo, haci preguntanan na gobierno, pa mira unda esaki ta pega y purba pa bin un solucion mas lihe posible”, Tevreden a señala.
El a agrega cu no mester lubida cu tin parlamentarionan local cu ta cana splica cu Parlamento no ta haci su trabao di control, locual ta un mentira flagrante, y Tevreden kier a recorda nan cu ta e fraccion # 10 di MEP, desde aña 2018 a entrega un mocion unda cu ta exigi pa gobierno bek na Parlamento duna splicacion na unda nan ta para cu presupuesto y splica cu transparencia, na unda e placa di Pais Aruba ta wordo gasta, y esaki a pusha un cambio grandi den pais Aruba na unda awe, nos pais, ta conta cu un presupuesto supletorio na final y na e di dos mitad di aña.
“Nos ta hopi orguyoso di por a logra tipo di cambionan asina aki, pasobra nan ta fortifica ciclo presupuestario pero tambe ta duna seguridad na pais Aruba, cu Parlamento ta haci su trabao corecto di controla, mira, fiha unda e presupuesto di Aruba ta wordo gasta”, e parlamentario a subraya.
Pa loke ta e peticion cu e fraccion di MEP a haci na gobierno, pa prome cu nan sali pa e Tripartite, Tevreden a indica cu nan a haya contesta pa loke ta e cuentanan anual. Nan ta trahando riba dje, y nan a premira cu na final di Augustus nan lo entrega esakinan.
“Nan a duna e splicacion aki na Algemene Rekenkamer, y a splica pakico no a logra cu ta mas bien pa falta di personal, y e sistema automatiza di administracion financiero cu a laga nan na caya, cu a trece un retraso den e cuenta anual di 2009. Pero gobierno ta premira di entrega e cuenta anual 2019 na mitad di October awo, y di eynan nan ta purba entrega e cuenta anual di 2020, 21 ’22’ y ’23 hopi mas lihe, pasobra un bez cu 2019 keda cla, e otronan ta sigui hopi mas facil, y e planning ta pa entrega 2020 na November proximo, 2021 na Februari 2024, 2023 na September 2024, manera ley ta prescribi. Esaki ta e splicacion al caso pakico gobierno a pega, y nan ta trahando pa keda cla mas pronto posibel.
