A.T.A. ta honra e herencia cultural di Asambeho durante Carnaval 71

‘Massive Brass Band lo habri Lighting Parade, Parada di Luz, Parada Grandi San Nicolas y Playa’

ORANJESTAD (AAN):  Na mesun manera cu a presenta e projecto di ‘Steelpan Project’ durante Carnaval 70, e biaha aki Aruba Tourism Authority (A.T.A.) orguyosamente ta anuncia lansamento di proyecto di Asambeho durante Carnaval 71. Un iniciativa cultural innovador cu lo ta trece un impacto y aporta na nos cultura grandemente.

            E proyecto vibrante aki lo conta cu 35 musico di brass band talentoso cu lo duna un presentacion espectacular. Como parti di nos cultura, e Asambeho lo gara e atencion di tanto comunidad local como di nos huespednan, creando un conexion profundo a traves di musica y tradicion.

            E proyecto di Asambeho ta resultado di un colaboracion entre A.T.A. y Go Cultura Foundation (GCF), cu ta refleha e compromiso continuo di A.T.A. pa sirbi como catalisado di innovacion y aporte na preservacion di nos cultura. A traves di e iniciativa aki, A.T.A. ta fortalece su rol como un aliado di e Industria Cultural y Creativo di Aruba. 

Un Celebracion di Impacto Cultural

            E impacto di e proyecto di Asambeho ta fungi como un simbolo riba e panorama cultural di Aruba. E aña aki a introduci un sonido fresco y dinamico cu ta inclui:

Inspiracion y Creatividad: a motiva musiconan local pa experimenta y innova, lansando e frontera di expresion cultural.

Fortalece Union: a crea un laso comunitario mas fuerte, uniendo diferente organisacion y talento cu un vision comparti

Reforsa Tursimo Cutlural: eleva perfil di Aruba como un destinacion cultural di clase mundial, ta atrae huespednan cu ta desea un experencia y tradicion unico di nos isla

Empodera Industria Creativo: ta facilita un plataforma pa musiconan, bailarinanan y profesionalnan tecnico por expresa nan talento.

            Mientras Carnaval 71 ta honra nos pasado y ta admira nos futuro, e proyecto di Asambeho ta para como un testimonio fuerte di e evolucion cultural dinamico di Aruba. E historia di e Asambeho ta disponibel riba https://www.aruba.com/us/our-island/history-and-culture/asambeho-history  pa tur cu ta desea lesa y admira. E ta personifica e balornan fundamental di A.T.A. cu ta e 4 ‘C’, esta Curashi, Curiosidad, Compasion, y Curason.

            A.T.A. y Go Cultura Foundation ta invita comunidad pa disfruta di e proyecto di Asambeho y pa celebra y aplaudi nos musiconan, nos herencia, y e unidad cu carnaval ta trece.     E proyecto di Asambeho ta mas cu un presentacion—e ta un movemento cu ta refleha e ritmo di identidad vibrante di Aruba.