FAVI a celebra cu hopi alegria Carnaval 71 bisti cu nan trahe carnavalesco

Katherine Midi, coordinador actividadnan, a informa:

ORANJESTAD (AAN) – Catherine Midi, Coordinadora Actividad na FAVI, den entrevista cu DIARIO a elabora tocante e celebracion cu nan tabata tin di carnaval, hunto cu e clientenan.

Catherine a comenta cu asina ta cumpli cu nan meta di saca nan for di e localidad y trece alegria den nan bida. “Awe nos por a mira nan feliz baliando hunto, y cu nan trahe, danki na nan famianan cu semper ta yuda nan den esakinan, cu nan por a bin cu nan trahe carnavalesco e aña aki.

            “Nos tabata tin nos competencia di petchi, nos a decora sombre, esaki ta un actividad cu nos tin normalmente durante e actividad ‘FAVI DU’. Nos a pon’e den facebook, p’asina aki e publico por a like. E prome lugar a bay pa Sandra Vrolijk cu 84 likes. Den e di dos lugar a keda Joan Lacle, y nan a bin cu nan trahe carnavalesco unda na di dos lugar a sali Jacky Rasmijn, y na prome lugar a sali Regina Sint Jago y a wordo corona tambe pa nos Trahado Social, Janis Tromp, y e share a wordo duna door di nos Prins cu Pancho, cual ta Piet de Cuba y Antonio Santos”, Catherine Midi a trece dilanti.

            El a gradici inmensamente Jeremy Lampe cu a bin cu steel band, y tambe ta gradici Benito cu a yuda regla esaki. Y a conta cu mas cantante cu a bin pone FAVI completo na ritmo di carnaval.

            Palabranan di danki Katherine a expresa pa henter e team di boluntario, cu semper t’ey pa yuda, nan clientenan, y nan trahado tambe cu ta yuda den tur actividad, sin lubida e famianan di e clientenan cu ta yuda nan pa por bin cu nan trahe carnavalesco, y forma parti di e dia. Gradicimento tambe pa SETAR y un compania priva, p’asina nan tin premio tambe pa duna FAVI su ganadornan di e celebracion aki.