A pone baki di desperdicio na 26 lugar rond di Aruba

Un solucion cu mester ta duradero

ORANJESTAD (AAN): Diasabra mainta, na oficina di Serlimar na San Nicolas, Gobierno di Aruba a duna inicio oficialmente na Dia Nacional pa Cuida Aruba. Prome Minister Mike Eman, hunto cu Minister Arthur Dowers, a invita henter comunidad pa uni forsa y contribui na un Aruba mas limpi, bunita y agradabel pa biba aden.

   Pa facilita e operacion nacional, a reparti baki pa desperdicio na 26 sitio rond di isla. Diferente instancia y compania a contribui cu baki, vehiculo, personal y otro tipo di sosten Entre e instancianan menciona durante e apertura tabatin Serlimar, DOW, WAP, Setar, APA, EcoTech, CMO y diferente organizacion comunitario y comercial.

   E accion di Serlimar lo concentra principalmente den San Nicolas, mientras cu otro grupo y organizacion lo atende diferente bario, cancha deportivo y espacio publico rond Aruba.

   Un solucion cu mester ta duradero:

  Minister Arthur Dowers a felicita tur persona y instancia cu a coopera cu e iniciativa. El a enfatisa cu limpia Aruba durante un solo dia no ta suficiente y cu e problema di desperdicio mester wordo atende di un manera structural. Minister Dowers a splica cu Gobierno a prepara un decreto cu participacion di diferente ministerio, entre nan Ministerio di Asuntonan General, Ministerio di Husticia y otro ministerionan cu tin responsabilidad pa maneho di desperdicio y espacio publico. Un comision nacional lo sigui coordina e trabao.

   Den futuro, otro grupo y instancia por wordo agrega na e comision pa contribui na un solucion duradero. Segun e mandatario encarga cu e cartera di husticia, e maneho mester inclui informacion, educacion, asistencia y, ora ta necesario, sancion. E meta ta crea mas consciencia cu Aruba ta pertenece na nos tur y cu cada ciudadano tin e responsabilidad pa cuide.

   Agradecimento na comunidad: Mainta ora cu a start cu e Dia pa Cuida Aruba, a haci mencion special di e trahadonan cu, a pesar cu pa hopi hende tabata un dia liber, a presenta nan mes pa sirbi comunidad.

   Tambe a expresa palabranan di sosten na Tico Tromp, kende recientemente a sufri un accidente haciendo e isla limpi, y a desea cu e por recupera pronto.