Antonio y Glenda Loefstop a festeha 60 aña di bida matrimonial

Rondona di nan 4 yiunan, 7 nieto y 11 bisanieto:

ORANJESTAD (AAN)-- Pareha forma pa Antonio y Glenda Loefstop a festeha e hecho cu 60 aña pasa nan a drenta den boto matrimonial.  Nan a celebra nan 60 aniversario riba Diadomingo 26 di juli 2026 cu un brindis y lunch na Eden Garden Coffee House na Piedra Plat.

Señora Glenda Loefstop, den un entrevista cu Matutino DIARIO a expresa cu hopi emocion, palabranan di gratitud pa tur persona cu a comparti cu e gran bendicion aki.

“Mi ta gradici tur hende, mi yiunan y nietonan y bisanietonan, specialmente, cu a comparti cu nos, cu nos a yega 60 aña di bida matrimonial, den bon, den malo pero nos ta hunto. Nos ta gradici Dios cu nos t’ey. Nos a casa dia 26 di Juli 1966, y nos ta dia 26 di Juli di 2026, cu ta 60 aña di bida Matrimonial. Nos ta hopi contento cu nos ta rond di nos yiunan, nos nietonan, bisanietonan. Nos tin cuater yiu, siete nieto, 11 bisanieto. Nos ta hopi orguyoso di nan, y di casa di nos yiunan tambe”, señora Glenda Loeftop a expresa.