A introduci Land ArubaAcademy, un plataforma digital di enseñansa gratis pa tur trahado publico

Prome Minister Evelyn Wever-Croes a amplia riba contenido di e proyecto

ORANJESTAD (AAN):  Prome Minister Evelyn Wever - Croes, durante e conferencia di prensa di gobierno dialuna mainta a elabora riba diferente topico, entre nan esun di Land Aruba Academy.

            Relaciona cu e tema aki Prome Minister hunto cu señor Adolph Croes di Departamento di Recurso Humano, a elabora riba e proyecto aki. Esaki ta un Plataforma digital di enseñansa gratis pa tur trahado publico.

            E Proyecto aki a wordo introduci dia 2 di Mei, 2023, den cuadro di introduccion di e programa di "Prestatie Magament" manera stipula den e landspakket. Apesar cu e proyecto aki a cuminsa un par di siman atras, a scoge pa duna un rueda di prensa pa asina mas empleado publico ta altanto di e proyecto y tur loke e ta ofrece.

            Prome Minister a splica cu e proyecto aki ta hopi importante, ya cu e ta brinda oportunidad na empleadonan publico pa sigui centenares di curso, workshops y webinars pa asina cada un por scoge kico ta locual nan lo kier siña y train nan mes mas den dje.

            Mirando cu un di e puntonan den landspakket ta e introduccion di "Prestatie Manangement", a wak e necesidad di duna e hermentnan necesario pa asina yuda e empleadonan publico logra destaca den nan trabou y/of como persona.

            Land Academy Aruba ta un plataforma digital di enseñansa cu ta brinda tur trahado den sector publico un variedad di hermentnan pa yuda nan traha riba nan mes. Tin un variedad online di mas cu 700 forma cu cada persona por scoge pa desaroya nan mes.

            E programa ta disponibel 24/7 y cada persona mes por dicidi riba ki tempo nan lo desea di bay. Tambe, no ta necesario pa empleadonan sigui curso cu ta relaciona specificamente cu nan trabou. Si un persona tin e deseo di desaroya un poco mas riba tereno digital, of riba nan propio desaroyo of cuido di nan mes, esaki ta un posibilidad.

            "Ta comproba cu cada trahado y/of persona cu inverti den su mes, sigui traha riba su mes pa asina desaroya mas habilidad, ta un persona mas feliz," Prome Minister a expresa.  

            Adolph Croes a agrega cu ya caba tin 85 departamento di gobierno registra di e 90 y pico departamento cu tin.

            Pa e empleado registra mester pidi esaki na su hefe kende ta manda avisa DRH por medio di un email cu informacion di e empleadonan. DRH ta activa e usuario y for di e momento ey, e empleado publico por bay haci tempo di e plataforma den un forma productivo y a base di loke ta necesario den su trabao, a bisa.

            Cada curso tin un duracion. Por ta un video cortico of por duna mas tempo. Tambe tin cursonan cu e empleado por haya diploma p'e, a indica.

            Pa mas informacion, bay riba e link di Departamento di Recurso Humano Aruba (DRH) https://hrportaal.drh.gov.aw/.