Jurette Croes, PR di DVG:
ORANJESTAD (AAN) – E relacionista publico di Departamento di Salud Publico, señora Jurette Croes, a duna di conoce cu e encuesta di salud 'STEPS', cu na comienzo a informa cu e lo ta den curso te na Juni, awo mirando cu e no a cana manera a desea, pasobra DVG a haya diferente contratempo, entre otro cu hopi hende ta ocupa cu trabao, STEPS lo ta “on going” te na fin di Juli.
Jurette Croes a reitera cu STEPs ta un encuesta di salud cu tin e meta di sa kico ta e custumber y influencia cu ta haci cu na Aruba nos ta mira diferente malesa no transmisible, manera Diabetes, Presion Halto, Obesidad, cancer, na un edad relativamente hoben.
“Anto, atravez di Steps nos ta bay combersa cu cierto ciudadanonan na diferente cas, di diferente edad, y sexo, pa sa kico nan ta custumbra di come, di haci deporte, di recrea, si nan ta consumi alcohol, si nan ta uza droga, etc. Tur tema ta di bo salud, pa cu tur e informacion aki bay traha manehonan nobo, structuranan nobo, di manera cu nos ta purba pa den futuro, a base di manehonan nobo, reduci e riesgonan aki di moda cu nos comunidad por tin un bida mas saludable”, Jurette Croes a indica.
E meta tabata encuesta 5.220 persona. “Te aworaki mi ta mira cu nos no ta bay logra encuesta e 5.220 personanan aki pa fin di Juli, pero nos ta hacie rond di 5 mil. Nos ta spera cu e cifra aki ta suficiente pa nos tin un bista general y con nos populacion su custumbernan ta y kico ta e custumbernan internacional cu por tin influencia riba dje”, Jurette Croes a conclui.
