A cuminsa pa crea un Control Center ultramoderno na WEB Aruba NV

Pa maneha produccion di awa di bebe

• E lo ta den edificio historico di 1957 

ORANJESTAD (AAN): Diabierna a tuma lugar ceremonia oficial pa cuminsa na transforma e edificio historico di 1957, cu antes tabata sirbi como localidad pa diferente departamento di e compania di awa y energia.

   “E edificio lo ta digno di e labor importante cu nos operadornan di “Produktie Water” ta eherce cu orguyo ya pa 93 aña,” ta loke e CEO di WEB Aruba NV, esta Alfredo Koolman a expresa.

   Como acto simbolico di ‘groundbreaking’, e CEO hunto cu Ministro Rene Herde, a devela un plakkaat inspirativo cu e texto “Nos trahadornan ta e heroenan silencioso tras di cada gota di bida”, honrando asina e operadornan di e plantanan di produccion di awa na WEB.  Segun planning, e prome fase di edificio lo keda cla na final di 2025.

   Durante e ceremonia, hefe di departamento di Produccion di Awa, sr. Victorino Alberts a expresa di ta sumamente contento cu e control center nobo. ‘E operadornan di nos plantanan di awa tin un gran responsabilidad. Nan tin cu cuida e fundeshi cu nos grandinan a cuminsa cu ne 100 aña pasa y nos tin e honor di tuma esaki over. Paso sin awa no tin bida.’, sr. Alberts a expresa.

   Redirigi Produccion di Awa: Ta trahando cu alma y curpa pa por cumpli cu un bunita tradicion pa muda y ta den e ‘cas nobo’ di Produccion di Awa promer cu Pasco. Cu e ceremonia tambe a inicia un periodo di atencion redirigi riba produccion di awa. Pa esaki a rekeri pa haci proyectonan diferente door di separa proyectonan cu tin di haber cu awa for di esunnan cu tin di haber cu energia. Pa realisacion di e proyectonan, WEB a busca partnernan tanto local como di exterior pa yuda cu e retonan cu WEB tin pa cu produccion di awa di bebe.

   Otro proyecto den e cuadro aki ta construccion di e di tres planta SWRO cu ya a inicia y lo ta den operacion na juni, 2026. Otro proyectonan den tapara ta diseño di un ‘Open Sea Water Intake’ pa planta SWRO 2 cu actualmente ta usa beach well, y optimalisacion di plantanan SWRO 1 y 2. Di e forma ey WEB ta percura pa semper tin suficiente awa di bebe pa nos isla.

   Concluyendo, sr. Koolman a indica cu ta sumamente importante cu pais Aruba tin produccion di awa di bebe den propio maneho. E no ta solamente un decision financiero pero sigur tambe uno strategico, en bista cu no tin otro fuentenan di awa di bebe riba e isla.