ORANJESTAD (AAN): Ministerio Publico Aruba (OM) a anuncia su plan di trabou pa 2025, pa medio di e jaarverslag ‘Op weg naar 2027’.
Den e plan nobo, e institucion ta pone enfoke riba profesionalisacion, optimisacion di e cadena penal y un manera integral pa enfrenta e tem di seguridad.
Segun OM, den 2025 lo tin atencion special riba combati criminalidad, trafico y contrabando di hende, y labamento di placa. Pa logra esaki, ta dependente di e capacidad di e partnernan den materia di investigacion.
Den marco regional, OM lo continua traha via e plataforma anti-ondermijning Cariben, mientras cu na nivel local lo sigui un proyecto nobo pa studiante den colaboracion cu Universidad di Aruba pa preveni criminalidad di hoben.
Na nivel operacional, OM kier acelera tratamento di casonan penal pendiente y baha e tempo di spera di casonan, pa asina e sospechosonan y victimanan por haya claridad mas lihe. E proceso aki ta depende di colaboracion cu Corte, cu mester ofrece suficiente ‘zitting’.
Na mesun momento, trato cu victima lo sigui fortalece segun e Wetboek di Strafvordering nobo. Dependencia di capacidad di Korrectie Instituut Aruba (KIA) ta keda un reto pa ehecucion di castigonan di prizon y castigonan substituto.
E plan pa 2025 ta inclui tambe reforsa cobranza di multa. Segun OM, danki na empleadonan administrativo temporario, cobransa na 2024 a subi notablemente. E tendencia aki mester sigui, cu loke OM lo aumenta di forma demostrabel su eficiencia y eficacia. Sinembargo, esaki ta rekeri continuacion den loke ta contratacion di e personal necesario.
Internamente, OM ta trahando riba terminacion di un plan di formacion revisa y optimisacion e di sistema di informacion digital. Ademas, implementacion di recomendacionnan di Caribbean Financial Action Task Force (CFATF) MER 2022 lo yuda fortalece e estado di derecho Arubano. Transparencia den comunicacion y aumento di capacidad operacional ta parti esencial di e enfoke pa gana mas confiansa publico.
A pesar di e reto di falta di personal den departamento di Beleid y Strategia, OM ta enfatisa cu e plan di aña lo wordo publica na tempo. “Meta principal ta un maneho penal cu ta decisivo y efectivo pa 2025,” segun e institucion.
