Nan ta bay busca esaki awemainta
ORANJESTAD (AAN): Awe porfin despues di casi un aña y mei di lucha, Comision 11, pa 11:00 am ta bay busca e registro di miembronan di CAPA.
Tur nos lucha tabata pa busca claridad ariba con e ladronicia di 382.000 Florin a sosode.
Prome, Comision 11 a purba via di compromiso cu directiva di CAPA, unda nan a manda cartanan pa ricibi mas informacion ariba e ladronicia. Como miembro di CAPA, nos a pidi reunion cu directiva di CAPA.
Tur reaccionnan di Directiva tabata negativo, hasta directiva a ignora Comision su peticion pa reunion, ni a contesta e peticion. Directiva a busca un confrontacion cu Comision 11. Esaki ta e motibo cu comision 11 a dicidi di bay huez y nos a ricibi rason di huez pa nos di Comision 11 ricibi e registro di miembronan.
Declaracionnan controversial: Diabierna dia 12 di September, nan a ricibi un email di hurista sr. Duijneveld, den representacion di directiva di CAPA, cu pa dialuna 11’or nos por ricibi e registro di miembronan.
Straño y hopi mahos, sr Duineveld ta bisa cu directiva di CAPA no a bay den apelacion contra e caso cu Comision 11 (miembronan di CAPA a gana), despues cu e mes, sr Duijneveld, a manda un carta via courier poco tempo pasa, cu directiva di CAPA ta bay apela e caso.
Siman pasa diaranson, e Presidente di CAPA telefonicamente a bisa cu CAPA a apela e caso contra e decision di Juez na fabor di Comision 11. Ta comision 11 a mustra directiva di CAPA cu prueba cu nan NO a apela e caso. Pues directiva di CAPA no sa kico nan hurista ta haci o no ta haci, directiva di CAPA ta disfuncional y incompetente.
Tambe sr Duijneveld ta bisa cu directiva di CAPA no ta di acuerdo cu e decision di Hues. Ta con anto?
Den e statutonan bieu art 30 y den e statutonan nobo cu e directiva aki mes a presenta mas o menos un aña pasa, e ta poni den articulo 34, cu ariba peticion di miembro(nan) despues di pago, ta ricibi e registro. Ta boso mes a trece den articulo 34; Acerca den e ley cu ta regarda e funcionamento di Cooperativanan na Aruba, AB 1987 nr GT 8, den articulo 11, lid 3, ta redacta mesun reglanan cu tin den statutonan di CAPA; Huez a duna un veredicto di acuerdo cu ley y cu statutonan di CAPA.
Ainda directiva di CAPA no ta di acuerdo. Wel, wel, e miembronan di directiva di CAPA no mester ta miembro mes di nos cooperativa, CAPA.
Pues cu nan ponencia anti-cooperativismo, mihor nan pidi retiro di CAPA.
Final: Pa tur hende por comprende, e lucha di Comision 11 ta pa trece claridad ariba con e ladronicia di 382.000 Florin, cual no ta dos placa, a sosode durante 9 luna.
