A celebra Dia Mundial di Teatro na Cas di Cultura

‘Teatro y un Cultura di Paz’

ORANJESTAD (AAN):  Dialuna cu a pasa tabata Dia Mundial di Teatro. Un dia cu ta para keto na kico teatro ta significa pa nos cultura y pais, y un dia di celebracion pa tur esnan cu ta forma parti di e gremio teatral. Riba e dia special aki a celebra e poder unico cu teatro tin pa inspira, entretene y uni varios hende di diferente cultura. Rond mundo tur artistanan den gremio di teatro ta bini hunto riba e dia special aki cu e meta pa crea conscientisacion di e importancia cu teatro tin den bida di cada ciudadano y nan comunidad.

            E tema di e aña aki proclama pa UNESCO ta ‘Teatro y un Cultura di Paz’. Esaki ta mustra e importancia di, atraves di teatro, por promove paz y harmonia den un comunidad di diferente cultura rond mundo. E actriz di Egipto sra. Samiha Ayoub a trece un bunita mensahe pa e dia Mundial di Teatro. E esencia di sra. Ayoub su mensahe ta, cu mirando cu mundialmente nos ta bibando den conflicto, guerra y calamidad, nos ta experenciando instabilidad. E instabilidad aki tin consecuencia riba nos estado material, spiritual y psicologico, pero teatro ta un forma creativo y poderoso cu ta laga tur duda y preocupacion disparce.

            ‘Den e contexto aki na Aruba, nos por mira cu a pesar di nos retonan, nos Pais tambe ta bendiciona di por tin un tarima unda cu nos artistanan por crea obranan cu ta duna bida y laga preocupacionnan disparce. E arte di teatro tin un balor grandi den historia cultural y artistico aki na Aruba, ya cu durante años ela sirbi como un medio di comunicacion, expresion y entretenimiento. Nos ta un pais chikito, pero rico na talento, arte y herencia cultural.’ Minister Maduro a expresa.

            Durante e anochi aki, y manera a bira custumber, a duna reconocemento na dos persona cu a dedica nan bida na e forma di arte aki y a contribui na e desaroyo di teatro na Aruba. E brinda un homenahe postumo na sra. Bernadina (Burny) Elizabeth Every, y tambe a otorga e Premio Nacional di Teatro na e conocido sr. Norman de Palm. Dos persona cu hopi amor, pasion, y cu trabou duro a sa di haci un excelente trabou cu a pone nan sobresali den e arte di teatro.

            Minister Maduro ta gradici UNESCO Aruba, Departamento di Cultura, gremio teatral na Aruba y tur cu a contribui na e bunita obranan cu a ser presenta riba e tarima di nos Cas di Cultura.