Banda di e diferente aspectonan:
ORANJESTAD (AAN) – Minister di Husticia, señor Rocco Tjon, den entrevista cu DIARIO a señala cu ora di toca e tema di independizacion di examen rijbewijs, esaki tin diferente faceta.
“Un entidad nobo ta bay ta encarga cu e tareanan aki y no Cuerpo Policial, y un bez cu nos tin esey in place, fase 2 ta bay ta pa revisa e leynan di trafico. Tin aspectonan anticua cu nos mester adapta, y tin desaroyonan nobo tambe cu nos mester acapara den e ley nobo cu nos ta bay introduci”, e dignatario a bisa.
El a agrega cu banda di esey tin e contenido di examen tambe, cu lo mester wordo revisa, adapta, y yega na consenso riba e aspectonan aki. “Obviamente esaki tin un link directo cu e adaptacion di leynan cu mester bin. Pues, esey ta e siguiente fasenan y obviamente den e fasenan aki nos tin un rol importante como ministerio, ya cu ta trata di cambionan di ley, pero na mes momento VRA cu tin hopi experticio riba e materia aki, lo wordo acerca tambe, pa nan forma parti di e fase 2 y 3 y esey tambe a wordo comunica na nan”, Minister Rocco Tjon a señala.
Den e reunion cu e mandatario tabata tin cu VRA, el a comunica nan tambe cu mirando e cooperacion cu e tin cu Hulanda, riba e tema aki y e sa cu VRA tambe tin e contact person cu Hulanda riba e tema aki, nan mes tabata positivo cu e desaroyo aki. “Un bez nos yega fase 2 y 3 cu ta encera adapta ley, cambia ley, y e parti di bay hunto analiza e contenido di e examennan, obviamente esaki lo yuda eleva e seguridad den trafico y VRA ta sigur un di e partners cu lo wordo acerca pa yuda den esaki”, e dignatario a conclui.
