Thomas Ruiz, Secretario:
*Seguridad di trafico mester ta prioridad #1
ORANJESTAD (AAN) – Thomas Ruiz, Secretario di Verening Rijscholen Aruba (VRA), den un entrevista cu DIARIO, a menciona cu nan a manda un ultimatum dia 17 di Maart, pa Minister Rocco Tjon, tocante dos punto.
Ruiz a bisa cu e minister no a tuma nan na serio, no tabata tin e decencia di duna nan un contesta, ni nada.
“Pa motibo aki nos a haya e mandato di nos miembronan pa haci un pre-accion y trece e puntonan cu nan ta bezig cu ne. El a bisa cu esaki ta perhudicando e trafico di Aruba completo. Uno, VRA a pidi pa aboli e Covid-beleid cu ta haci un tiki dificil pa nos uza un machine of un vehiculo pa bay examen. Dos, cu ta peor ainda, nos a bisa nan pa nan investiga si e extra material cu nan a hinca den categoria A di Bromer, categoria B di bus, categoria C di truck y categoria E di trailer, ta basa riba algo huridico. El a agrega cu esaki pasobra nan ta hayando hopi hende ta druip y ta keda druip y nan ta ripara cu tur e material extra aki no ta poni den ley”, Thomas Ruiz a señala.
El a agrega cu tur otro ley cu examen ta basa, normalmente ta poni den cual wetboek ta basa riba dje, y pa e motibo aki tambe VRA ta bisa cu si no tin un base legal mester kit’e, pasobra e ta strobando hende pa nan saca nan rijbewijs y no ta duidelijk kico ta bayendo malo, pasobra no tin ni un hende ta controlando examen tampoco.
E consecuencia ta cu hendenan no ta haya rijbewijs costando nan placa, nan no por haya trabao, dunadornan di trabao no por haya hende cu e rijbewijs necesario, y tambe ta forza hende cu nan ta bay core clandestino sin rijbewijs, cu ta trece e trafico na peligro, y esey VRA no kier. VRA ta haci un yamada na e minister Rocco Tjon, pa duna nan oido! Den nan ultimo combersacion nan a palabra cu lo drecha e comunicacion di e manera miho posible, pasobra ta na mesa por trece solucion y compronde otro, y tur hende ta di acuerdo cu seguridad den trafico ta number uno!
