4 di mei a recorda tur heroe cu a perde nan bida durante Guera Mundial

ORANJESTAD (AAN):  Dialuna 4 di mei a tuma luga e ceremonia conmemorativo di “Dodenherdenking 2021”. Reino Hulandes ta conmemora esnan cu a fayece durante guera.

            “76 aña pasa e Segundo Guera Mundial a finalisa. Tur aña riba e fecha 4 di mei ta para keto y recorda tur esnan cu a perde nan bida den guera. Reflexionando riba un dia asina, e ta importante pa realisa dicon e ta importante pa nos biba den pas cu otro, pasobra nos no kier guera mas, tabata palabranan di Prome Minister Evelyn Wever - Croes na e ceremonia conmemorativo di e aña aki.

            Na e ocasion a recorda tur esnan cu a lucha den guera y ciudadanonan cu a perde nan bida den guera. No solamente den e di dos guera mundial, pero den tur guera, pa nunca lubida nan balentia y nan sacrificio pa nos libertad. 

            “E unico forma pa garantisa paz ta door di siña nos muchanan for di chikito, respet, tolerancia y empatia pa otronan y esaki ta un responsabilidad di nos tur”, Premier Wever - Croes a conclui.