ORANJESTAD (AAN): Diaranson atardi, esta 5 di Mei 2021 pa exactamente 4:35 pm, un temblor cu magnitud di 3.2º riba Scala di Richter a keda registra den area zuidwest di Aruba.
E epicentro di e temblor aki a wordo localiza na 11.94º Nort y 70.47º West. Esaki ta como 79 kilometer Zuidwest di Barcadera, Aruba. Esey ta igual cu 41 km Noordwest di Punto Fijo.
E temblor di 3.2 aki ta realmente uno di esnan mas fuerte compara cu e ultimonan cu a keda registra rond di e isla.
E epicentro e biaha aki a wordo localiza na un profundidad di 26.1 km. No tin ningun informacion di daño cu a keda registra.
