ORANJESTAD (AAN): Conseho Electoral ta esun cu tin di tuma decision final si acaso pa eleccion 2021 di dia 25 di Juni venidero lo acepta Rijbewijs como un identificacion valido of no.
Tur esaki tin di haber cu e hecho cu pa algun aña, tabata imprimi Rijbewijs na Aruba pero e informacion cu ta wordo imprimi riba dje tabata ser haci manualmente. Consecuencia di esey ta cu tin hopi Rijbewijs cu eror riba dje.
Pues no a usa un database existente pa djis traspasa informacion corecto pa e Rijbewijs e tempo ey.
Pa tal motibo mes, tin hopi hende cu tin nan Rijbewijs cu ta indica cu nan a nace na Aruba, siendo cu esey no ta e caso. Tambe tin hende cu Rijbewijs cu fecha robez di nacemento, etc. Tur esey a bin debi cu tabata type e nombernan manualmente, y fout por wordo haci.
Desde cu Censo a keda encarga cu emision di Rijbewijs, e textonan aki ta bin for di un database existente unda tur dato ta pasa bon y sin problema.
Segun Sharin Luydens di Censo, ainda decision no a cay. El a bisa cu ta Conseho Electoral ta esun encarga pa tuma decision esey dentro di poco.
