29% di persona no vacuna riba 18 aña ta causante di 87% di caso den ICU y 77% di morto di Covid-19

ORANJESTAD (AAN): Durante conferencia di prensa, Minister Dangui Oduber a indica cu actualmente tin 9 persona den ICU na Aruba, 12 persona interna den ICU na Colombia cu mester a wordo transporta cu Air Ambulance,

43 persona ta den departamento di Covid, 1 den departamento di maternidad, kiermen un total di 65 persona interna, sea na Aruba y na Colombia.

Minister ta kere ta importante pa enfatiza cu di tur persona cu ta interna den Hospital actualmente, nan condicion di salud ta como lo siguiente:

• 38 porciento ta sufri di presion halto;
• 31 porciento ta diabetico;
• 7 porciento ta pashent di dialisis;
• 4 porciento tin problema di curazon;
• 3 porciento tin cancer
• 28 porciento ta pre-obeso;
• 42 porciento ta obeso.

Minister Oduber a bisa cu lamentablemente no ta personanan mas saludable y esaki ta ocasiona cu apesar cu e personanan a vacuna, nan ta haya nan mes cu complicacionnan cu nan salud, debi na e hecho cu nan tin un condicion preexistente. E vacuna ta yuda nan, pero naturalmente  pa motibo di nan condicion fisico, nan mester a wordo interna den Hospital. Tin cu a wordo interna den ICU, pero tabata caso di 60 plussers y ya tabatin un condicion preexistente.

Desde cu e vacuna a yega Aruba, Gobierno a stress hopi riba e importancia pa recomenda mas hende pa tuma e vacuna, pasobra esaki ta proteha bo mes y evita cu bo ta wordo hospitaliza y evita cu bo por fayece. Minister a bisa cu nan a tene varios campaña exitoso di vacunacion, y nan tabata satisfecho di e cantidad di hende cu a haci uso di e oportunidad pa bay vacuna, pero obviamente no a logra yega e meta cu nan a pone nan dilanti, ora nan a cuminsa cu programa di vacunacion. Pesey e ta kere cu ta importante pa trece datonan dilanti con e vacuna ta duna resultado.

E datonan cu Gobierno ta dispone di dje di Hospital ta mustra cu 29 porciento di esnan cu no ta vacuna riba 18 aña ta causante di 82 porciento di esnan cu ta hospitaliza; ta causante di 87 porciento di esnan cu ta den ICU y 77 porciento di mortonan di Covid. Minister a enfatiza cu esaki ta e parti di poblacion di riba 18 aña cu NO a tuma e vacuna. Esaki ta demostra cu na momento cu un persona ta vacuna, e vacunacion completo, e ta preveni hospitalizacion y morto.