No tin tempo mas pa argumentonan cu tabata peligroso prome cu Covid-19 - Sistema medico di e pais ta rementa y causa daño na henter poblacion - Aruba no tin e structura pa complace hende cu ta hunga cu morto sin motibo
ORANJESTAD(AAN)- Na 2020, hende cu ta kere den Dios, a hinca rudia y pidi cielo pa bini un yudansa den e menasa di Covid-19. Hende a sinti su mes menasa pa un peliger invisibel, incomprendibel, pa cual henter mundo no tabata prepara.
Aruba, mescos cu ta e caso cu tur pais cu ta wordo maneha a base di responsabilidad, tabata prepara pa loke por presenta normalmente den un comunidad. Pa enfermedadnan di pulmon entre otro, tabata tin un cantidad di ekipo cu den un situacion normal ta necesario.
Ora mundo a realisa kico Covid-19 ta haci, na careda fabricanan mester a produci mas y mas ekipo pa por yuda tur pashent ora nan bira malo.
Pa hende por a defende su mes contra e Coronavirus nobo, mester a cera economia loke den mundo moderno ta nifica, cera porta di casnan di famia pa cuminda y tur loke hende mester pa biba.
Ningun hende por a kere na prome instancia, cu pa final di 2020, ya tabata tin vacuna cu por a proteha hende. Vacuna, cu ta mas importante cu remedi pasobra remedi mester cura un enfermedad mientras un vacuna ta evita un enfermedad.
Por a spera cu ora e vacuna a yega Aruba, tur hende lo a bolbe hinca rudia pero e biaha aki pa yama Dios danki, cu yudansa a yega.
Kico a pasa? Laga nos ta sumamente honesto awe y ban bolter e medaya cu mentenan cu ta kere cu nan ta moderno, kier presenta pueblo y asina sconde tras di un tendencia cu no awe, pero hopi tempo prome cu Covid-19 ya a hinca mundo den problema.
Pasobra pa nos ta sincero, hopi pero hopi tempo prome cu Covid-19, DIARIO ya a publica informacion di menasanan di Cuido Medico di parti di pensamentonan moderno, cu kier amplia conocemento medico cu teorianan cu no tin pia pa para ariba pero si ta “moderno” y ta produci placa na cantidad na mundo di parti di charlatannan sin ningun estudio of prueba cu profesionalnan si mester prome cu nan atende un pashent of pone un remedi riba mercado.
Prome cu Covid-19 a bati na porta, DIARIO a papia di casonan den cual mayornan ta pone bida di nan yiunan na peliger pasobra “vacuna” cu a scapa hende di pandemia di polio, di cacheto, di Hepatitis B cu ta destrui higra di hende, entre otro, lo ta peliger pa salud.
Prome cu Covid-19 ya DIARIO a enfrenta mundo cu e berdad di curanderonan moderno, cu ta destrui loke ciencia medico a alcansa pero ora nan mira morto nan dilanti, si ta exigi tur forma pa scapa nan bida.
Aruba mescos cu tur pais na mundo ta ekipa pa duna bon cuido na tur hende a base di un normal cu a wordo kibra dor di Covid-19.
Aruba no tin placa pa sigui paga pa resultadonan di casonan pa cual hende a dicidi pasobra nan ta nenga di vacuna.
No tin excusa cu no ta wordo uza.
Cu tin hende cu a pesar di e vacuna ta haya Covid-19, ta berdad. Tin hende ta nace cu condicionnan cu ta stroba un vacuna haci su trabou. Pero pa e gran mayoria e ta evita morto y ta evita desaster.
Awe paisnan pober cu no por paga pa un vacuna ta sclama pa e yudansa pa enfrenta Covid-19, cu ta destrui produccion mundial, ta kibra economia, destrui cuponan di trabou y bienestar general.
Pero mentenan moderno kier yuda Covid-19 progresa, ta nenga vacuna y asina por sigui.
Awe un palabra cla sin sentimentalismo ni nada. Pasobra ora bida di hende no tin balor, tur palabra a caba.
Aruba no por cu e cantidad di caso cu e conoce di Covid-19. Un comunidad di 120 Mil habitante no por cu 110 caso nobo pa dia.
Muchanan inocente ta bira victima di hende cu no a vacuna. Comunidad mester paga, kita pan for di boca di hende cu si kier biba, pero ta wordo condena na posibel morto.
Esaki ta democracia? Esaki ta derecho humano? Esaki ta progreso? Esaki ta avance cientifico?
Covid-19 a entrega mundo moderno un berguensa nobo. E abuso contra hendenan cu ta paga pa un sistema pa proteha nan bida, cu ta wordo destrui na man di hende sin compasion.
Aruba no tin placa pa sigui cu e situacion aki. Aruba no tin un produccion pa atende 110 caso nobo pa dia, cu no ta necesario.
Awe palabra cla mester wordo papia cu tur cu ta yuda hende muri mal morto!
