FADA ta organisa tayernan pa mayornan ta na altura riba kico e peligernan di 'vaping'

Rulienne Arends di Fundacion Anti Droga Aruba:

ORANJESTAD (AAN): Rulienne Arends, trahado preventivo di Fundacion Anti Droga Aruba (FADA) a haci un suplica na tur mayor pa busca informacion relaciona cu e uzo di 'vaping'.

Manera DIARIO a trece dilanti, tin hopi mucha y tambe hoben cu ta uzando 'vaping' (e-cigarettes) y hopi ta bisa cu nan mayor a cumpra esaki pa nan. Tambe hopi no sa di e risico di uza 'vaping'.

            Arends a splica cu FADA tin full un workshop pa mayornan aunke ta specificamente pa mustra nan tur e productonan pa nan por wak ya cu nan tambe tin cu yuda den e parti di educa nan yiunan y pa no djis duna nan algo cu por ta dañino.

            Pesey tin e workshop aki specialmente pa e mayornan pa nan ricibi e informacion, a remarca.

            Di otro banda, hopi biaha e muchanan ta haya un tiki cen na cas, ora nan ta cumpli cu nan tareanan y no sa si e hobennan ta bay cumpra scondi pasobra por haya nan cumpra na diferente lugar na prijsnan economico locual ta mas accesibel pa nan, a splica.

            'Vaping' ta contene nicotina y e bendedornan lo ta na su lugar pa pidi un ID ora di bay bende un producto  y si ta un menor di edad pa no bende nan esaki mirando cu ta algo dañino, Rulienne Arends a enfatisa.

            Hopi hende no ta consciente riba con 'vaping' a cuminsa su mes y con e producto a bin dilanti. Lamentablemente tur cos a cambia y no ta wak e uzo di 'vaping' mas na e forma cu el a wordo introduci na mundo.

            Ya el a bira algo "gewoon social. Nan ta uz'e pa trend, pa fit in y nan ta lubida e peliger cu e por trece cu ne ora cu bo no ta uz'e na  e forma cu e tin cu wordo uza", a splica.