Edwin Jacobs, director di AZV:
ORANJESTAD (AAN) – Director di AZV, Ir. Edwin Jacobs a indica den conferencia di prensa tocante cifranan di 2020, cu mirando den perspectiva e desaroyonan di AZV den GDP, esaki ta un dato cu ta wordo uza, principalmente pa Instancianan Internacional pa midi e grado cu ta contene crecemento y ademas, hunto cu e gastonan colectivo, ta indica kico esakinan ta saca di e GDP pa financia gastonan publico.
“Mas e gastonan aki ta, menos favorable ta pa e economia, pesey ta importante pa mantene e totalidad di e gastonan colectivo, den relacion cu GDP, na un nivel aceptable rond di 40 pa 41%.
Nos ta mira cu na aña 2019, cu tabata un bon aña pa AZV, unda cu e economia tabata tremendamente bon, cu resultado di un bon entrada, e aña ey tabata tin un surplus tambe; no tabata tin mester di contribucion di e Pais, y e tabata na 7.6%”, director di AZV a señala.
“Durante e pandemia nos tur sa cu e GDP a cay, e gastonan di AZV den porcentahe di GDP a aumenta, y aña pasa nos a wak cu e ta bayendo bek na e ritmo cu tabata tin prome cu e pandemia, y aña pasa nos a cera cu 8.2%, segun e ultimo proyeccionnan economico di Departamento di Economia”, Director di AZV, Edwin Jacobs a señala.
