"E parlamentarionan nobo di MEP ta bin cu un chispa pa yena bateria y sigui cu e bon trabao"

ORANJESTAD (AAN): Shailiny Tromp-Lee no ta nobo mas pa Parlamento, pero Diabierna el a conta DIARIO cu e ta sinti cu ta un honor pa huramenta un biaha mas como parlamentario.

“Pa mi ta un honor sigur pa huramenta como miembro di e organo mas halto di nos pais, hunto cu 7 otro colega”.

Mi ta contento pasobra mi ta kere cu awor, door cu nos huramentacion a bira un realidad, tambe concretizacion di Gabinete Wever Croes 2 ta bay ta un realidad.

Mas lihe nos por cuminza traha awor riba enberdad sigui riba e parti di desaroyo y incentivonan cu ta necesario pa nos rebiba nos economia y crea e stabilidad cu ta asina necesario pa nos pais, segun Tromp-Lee.

DIARIO a puntra e parlamentario con e ta wak e otro miembronan nobo di Parlamento.

El a splica cu pa loke ta e fraccion di MEP, el a siña conoce esnan nobo manera Alvin Molina, Marco Berlis y Arthur Vallejo den e trayectoria interno di e partido.

“Mi ta bisa cu nos ta un team cu ta complementa otro, mirando tambe cu nos ta bin di diferente area di experticio”.

Nos a conoce otro durante campaña y durante e cursonan interno cu nos tin y mi a ripara cu nan ta hendenan cu pasion y cu e chispa di trece cambio y kere den e hecho cu tur cos ta posibel.

Nos ta 6 di MEP cu a sinta 4 aña caba den Parlamento y e 3 parlamentarionan nobo ta net pa yena e baterianan aki, pasobra tin trabao pa haci, segun Tromp-Lee.