Zara Rozeboom a logra e prome oro pa Aruba na ASU2025

Medaya di oro pa Aruba na Paraguay

• El a sobresali den competencia di iQFoil
• Clasificacion automatico pa Lima2027 

ORANJESTAD (AAN): For di chikito caba, Zara Rozeboom ta un persona cu amor inmenso pa lama, y tabata admira e deporte di Windsurf.  E amor aki a keda crece, y a bira un berdadero pasion pe, y a hasta upgrade y competi den Windsurf tipo iQFoil.

   Su dedicacion pa purba cada rato di subi lama ora e ta na Aruba, y cu desde 7 luna pasa el a start cu training intensivo pa su participacion den Weganan Panamericano Junior 2025 na Paraguay, a yud’e yega riba e plataforma di mas halto.

   Esey ta debi cu riba Dialuna 18 di Augustus 2025, Zara a logra obtene e prome Medaya di Oro pa Aruba den e competencianan aki tambe yama ASU2025.

   Despues di algun dia tenso unda no por a competi pa motibo di falta di biento y despues un dia di 4 regatta unda na inicio na e di 5 tabata empata cu e atleta di Argentina, atleta di Aruba, esta Zara Rozeboom a demostra di con e merece gana e Medaya di Oro y e cupo pa bay Weganan Panamericano Lima2027.

   El a logra e victoria den su regatta final.  Zara a indica cu e tabata un siman hopi emocional.  El a splica cu riba Dialuna e situacion tabata hopi preta, y nan a tene 4 careda na final, pero prome a haci solamente 3 careda. E puntonan tabata basta cerca di otro, e.o. cu Argentina.

   E final careda ta uno caminda Zara a pensa awo e ta bay pa “tur cos of nada”, pasobra e sa cu e mester bay gana.  E ta contento cu el a gana, y cu e tin awo e medaya di oro.  Tambe el a haya e ticket cu ta indica cu el a cualifica pa e Weganan Panamericano Lima 2027.

   Di e forma ey Zara a experiencia e momento involvidabel aki, y e ta sumamente orguyoso di a logra esaki pa pais Aruba.