Trayectoria deportivo di Wendeline Evelyn Dirksz.

ORANJESTAD (AAN)- E torneo Splash Softball team enconeccion di nan 20 aniversario ta wordo dedica na Wendy Dirksz y Rubia Ras.

Aki ta  sigui un resumen di e trayectoria deportivo di Wendeline Evelyn Dirksz, mihor conoci como Wendy.

  Su trayectoria como softbolista a cuminza di 12 aña, ora el a cuminza train den pida cunucu di su welo, den e bario di Shete. Esey tabata den aña 1998. Na aña 1999 te cu 2001 el a join e team di Little League bao guia di Maria y Tico Henriquez.  Na aña 2001 te cu 2004 el a hunga den liga Flamboyan cu mesun manager. Den e aña ey tambe el a reforza team di Tanki Leendert y Sweet Devils Fast Pitch.

  Na 2004 el a join e team di ex Gianomar Hit Girls. E manager tabata Sr. Raul Schwengle. Despues di esey el a hunga den diferente torneo aki na Aruba mes. Na 2007 e nomber di e team a wordo cambia pa Bud Light hit girls. Y na ultimo e nomber di e team a cambia pa Splash Girls cu Sra. Angela como manager.

 Wendy den su carera cu Splash el a viaha varios caminda. E team a competi den copa ABC na Boneiro y Corsow, y tambe varios otro torneo cu Splash Softball team a wordo invita pa competi aden. Na 2019 Splash a wordo invita pa prome biaha den e Caribbean Tournament unda cu team di Aruba, Corsow, Boneiro, Sint Maarten y Hulanda a sa di competi pa e copa maximo.

  Segun Wendy, “Ami semper a hunga bala cu alma y cuerpo pa e deporte cu mas mi stima cual ta softball. Mi ta un persona cu  caracter fuerte y un hende hopi competitivo. Mi idiologia ta cu competencia semper ta bon y sano”.