Minister Endy Croes tabata presente pa duna sosten na atletanan den e prome edicion di ‘Battle of the Relays’

ORANJESTAD (AAN): Diadomingo den oranan tempran di mainta Minister Endy Croes a bishita e prome edicion di ‘Battle of The Relays’, organisa Aruba Triathlon Association.

            E competencia a tuma luga na Mangel Halto y a conta cu participacion di mas di 175 atleta den diferente categoria. Un competencia cu Aruba Triathlon Association a inicia, cu ta uni diferente deporte y tin como obhetivo pa disfruta y cera conoci cu e mundo di triathlon.

            E competencia aki ta consisti di tres parti: landamento, ciclismo y atletismo.

            E Mandatario a expresa cu ta sumamente impresionante pa sinti e entusiasmo y pa mira e fanaticada specialmente e mayornan banda di caminda ta duna tur apoyo y sosten na nan yiunan, cu a participa den diferente categoria, ta di admira y aprecia e alegria cu ta reina mirando nos atletanan practicando deporte.

            Minister Endy Croes ta felicita Aruba Triathlon Association pa tremendo iniciativa, alabes ta gradici e boluntarionan cu yuda y tur esnan cu a haci e competencia posibel. Masha pabien ne atletanan cu a participa y haci e ‘Battle of the Relays’ uno sumamente exitoso! Pabien na e ganadonan!