Torneo Splash Softball team celebrando 20 aniversario dedica na Rubia Ras y Wendy Dirksz

ORANJESTAD (AAN)- E team di Splash Aruba Softball team ta celebrando nan di 20 aniversario cu un grandioso torneo internacional di Himno y Bandera.

Esaki ya cuminza dia 31 di Maart y lo sigui awe y mañan. Den e torneo aki tin participacion di Splash SBT y Sweet Devis di Aruba, Dutch Ladies Scorpio y Caribbean United y un team di Merca.

  E torneo aki ta dedica na Sra. Rubia Ras y Wendy Dirksz y ta tumando lugar na Madushi Stars na San Nicolas.

RUBIA RUTSELLA RAS

Rubia ta bin for di mayornan cu tabata deportista, Vera Ras campeon pitcher Oranjestad Store y seleccionnan pa varios aña y tata Joaquin Ras futbolista. Rubia a cuminza hunga softball cu su 10 aña y ta hungando te awor aki cu su 63 aña di edad.

  Desde comienzo Rubia a hunga pa un solo team, pero bao diferente nomber Love Birds, Toshiba, Caribbean Village, Nevada (ultimo 20 añanan) y Kool Aid 10 aña.

Na aña 1976 Rubia a forma parti di seleccion di Antiyas como shortstop na Mexico. Na aña 1978 Rubia a forma parti di un equipo hoofdklas na Diemen- Hulanda como shortstop y pitcher.

Seleccion cu Rubia a biaha pek un biaha cu seleccion Antiyano y tur despues cu seleccion Arubano.

Rubia tin record te awor di tin mas cu 600 wega picha y semper cu bon resultado. El a participa na Mundial 1989 USA Illinois, un record inolvidable pa Aruba. Indonesia/Tapei 3 – Aruba 6. Argentina 2 – Aruba 3. Te ainda ningun persona tin un record pa Aruba asina di ta 2-0 den un mundial.

Den otro deporte Rubia a hunga futbol den Aparicio Stars y pa RCA na 2002-2003. Y den basketball damas Marlboro bao direccion di Harold Farro.

Actualmente e ta hungador di Tanki Leendert Girls, manager di T.L Angels juvenil y grandi hunto cu Tico Danies y Evelino Silie, ta coach di seleccion di Aruba, y ta score y umpire di Liga ABBA y Bush League softball y pa ASB. Rubia ta un mama hungando hunto cu su 3 yiunan pa Tl Girls y semper cu amor pa e wega tan stima softball. Rubia ta dedica pa yuda otro muchanan practica y desaroyo den deporte cu respect y disciplina.