Team Snor y Balashi Knights p’e bataya di Antias

ORANJESTAD (AAN):  Shonnan, awe diasabra, 22 di september, cuminsando pa 8’or di anochi, ta bay tin otro tremendo bataya di domino en preparacion p’e gran encuentro cu hermana islanan Corsow y Bonaire.

Dos ekipo cu lo representa Aruba, lo bay midi forsa diasabra awor pa wak cua team lo hunga “rol” di Gran Cacique. Manera semper, entrada lo ta completamente gratis pa pueblo en general, y durante halftime pasapalo lo skeiro na ordo totalmente por nada.

            Nada menos cu e ekipo estelar di 2024, Team Snor bou guia dje ilustre magno drs. Snor Perez, lo enfrenta e team cu campeon mundial, esta Balashi Knights. Un anochi sumamente interesante, ya cu aki lo investiga ken nan teorianan “quantum” den domino ta mas avansa. Pa duna nos lectornan un idea con avansa e dokternan aki den domino ta, nos ta trece un teoria avansa y controversial di Snor Perez dilanti: si bo lanta cu 6 piedra di 6 den bo man, pero bo tin un un-y-blanco tambe den bo man, bo no por sali c’un piedra di 6! Na Hulanda nan ta bisa “dat gaat boven mijn pet”! Na Merca nan lo bisa “that’s above my paygrade!” Pero enfin, ken ta nos pa cuestiona e teorianan di Inteligencia Artificial uza awendia.

            E preparacion aki ta bay den cuadro di preparacion p’e torneo benidero entra e islanan ABC. Di Aruba lo ta Team Snor y Balashi Knights. Di Corsow lo ta Nos Ambiente y E Piedra DT. Di Bonaire lo ta Rincon Stars DT y Angel Stars DT. Keda pendiente shonnan p’e anuncio di fecha y orario p’e sambombaso aki entre islanan ABC!