Seleccion di Aruba a perde contra Visakha FC den un wega amistoso

ORANJESTAD (AAN):  Diasabra pasa e seleccion di Aruba di Futbol a hunga contra Visakha FC den un partido Amistoso na Prince Stadium den Cambodia.

E partido a finalisa cu un victoria di 3-1 pa Visakha FC.

            E partido a mira un bentaha trempan di Visakha FC desde e principio, cu Ramon Tanque a converti un penalty na minuut 14 pa habri e marcador. Cinco minuut despues, na minuut 19, Ott Mi. a dobel e bentaha. Den di dos mita, Tanque ta logra su di dos gol di e partido na minuut 52, pa pone Visakha FC 3-0.

            Aruba a responde cu un gol di Rensel Bryson na minuut 66, pero no tabata suficiente pa cubri e desventaha, y e partido ta finalisa cu un score di 3-1.

            Proximo partido di seleccion di Aruba lo ta contra Cambodia den un partido amistoso internacional 25 di maart 8:00 AM (Ora di Aruba).

            Marvic Bermudez, coach principal di seleccion di Arubano, a papia despues di e partido:

            “Ta un partido di un nivel hopi halto, specialmente tumando na cuenta cu nos a hunga contra un ekipo profesional. E nivel di e hugadonan ta keda claramente visibel, specialmente den su fisico, condicion fisico, y tecnica cu lo ta loke ta haci nan profesional. Aparte di esaki, nan tabatin 6 hugado de refuerso: 2 di Brazil, Hapon, Sur Africa, Maroco, y Uzbekistan. Pa locual ta trata e preparacion pa cu e partido ta esun mas promociona cu nos a experencia cu seleccion di Aruba pa locual ta trata media y tambe un stadion asina moderno y profesional. Pa nos, ta importante haci un analisis detaya di video pa saca tur e momento cu nos por siña di dje mas liher posibel, pa nos por mihor prepara pa e siguiente partido contra Cambodia.”

            E Seleccion Arubiano ta sigui trahando fuerte den su preparacion pa e proximo desafio den e Partido Amistoso Internacional.