Team di SCA a bira Campeon di Final 50Plus Fedeveta Copa Roy Helder

ORANJESTAD (AAN): Tur fanatico di futbol Diasabra pasa por a goza di drama, emocion y weganan hopi bon hunga di e ultimo dia de Fedeveta.

   E prome wega a bay pa determina kende ta sali na di 3er lugar 50Plus entre Jong Aruba y SV Hooiberg.  Atakenan a bai duro di ambos banda pero e defensanan a bin pa sera porta pa gol, asina e wega mester a bay over na tiramento di penalty unda Hooiberg a logra score mas cu Jong Aruba, y a bay cu e Copa di 3er lugar Un pabien na Hooiberg y na Jong Aruba.

   Despues a sigui e wega mes! E Final di 50 Plus entre SCA vs. Arusur! E tabata un wega unda cambio di stel-op a hasi un diferencia ya cu SCA a ataca e prome mitar incansabel forzando e sranamanan pa defende cu alma y cuerpo.

   Cu emocionan  bayendo halto mes ( asina hopi e teamnan kier e Copa di Campeon) y un trabao duro di Referee Eve Samingoen y su asistentenan, SCA a logra domina e wega y gana 4-1 e final aki. Despues di wega por a wak ambos team duna otro man y a laga tur emocion riba tereno.

   E yiu muher di Roy Helder (qepd) a otorga e trofeonan y a duna un palabra di danki pa a honra su Tata di e manera ey.