ORANJESTD (AAN): Minister di Deporte, mr. Gerlien Croes, ta expresa su gran orguyo y felicidad pa e atletanan di Aruba cu a logra marca historia pa nos isla den baseball un biaha mas.
E seleccionnan di baseball di U6, U10 y U16 cu a participa den e prestigioso One League Baseball Tournament na Fort Myers a sali cada un como campeonnan di Caribe den nan categoria — un prueba di nan talento, disciplina y orguyo Arubiano.
“E logro sobresaliente aki di nos seleccionnan ta inspira nos tur”, Minister Gerlies Croes a bisa. “Boso a demostra cu na un edad asina hoben, cu trabou duro y dedicacion, boso por pone Aruba riba e mapa y hiba nos bandera cu orguyo riba un escenario internacional den deporte. Boso ta berdadero campeonnan den tur sentido di palabra”.
Minister Gerlien Croes tambe ta gradici e mayornan, coachnan, staff y tur esnan cu a para tras di e mucha- y hobennan aki, pa a haci e logro aki posibel. Tras di cada victoria tin un ehercito di sostenedor. E mayornan cu ta inverti tempo y amor, e coachanan y staff cu ta guia, y e comunidad cu ta kere y apoya — boso tur ta parti di e exito aki. Danki pa ta e pilar di apoyo y fortaleza pa e atletanan aki.
E victoria aki, no ta solamente trofeo, sino logronan clave den construccion di futuro deportivo di Aruba. Deporte ta siña nos muchanan e balornan cu lo dura henter nan bida: traha den ekipo, respet y ambicion.
Como minister di deporte, mi ta kere firmemente cu nos inversion den deporte pa hobennan ta un inversion den futuro di nos nacion. E atletanan aki a demostra nos dicon. Nan ta laga nos mira cu nos futuro ta briyante, paso hobennan determina, talentoso y cu speransa ta construyendo esaki.
Deporte no ta solamente wega! Deporte ta clave pa un Aruba mas saludabel, mas fuerte y mas uni. Laga nos sigui sostene y kere den nos atletanan, paso asina so nos ta forma e campeonnan di mañan.
{gallery}Minister Gerlien Croes ta felicita seleccionnan U6, U10 y U16 cu nan logro den One League Baseball Tournament na Fort Myers{/gallery}
