Team Acrobatic Routine di Aruba a obtene medaya di brons

ORANJESTAD (AAN): E competencianan di Juegos Centroamericanos y del Caribe Santo Domingo 2026 a yega su fin,

y ta importante pa enfoca riba e fenomenal prestacion di atletanan di natacion artistico di Aruba, cu a gana medaya di brons den ‘Acrobatic Routines’.

   Den nan ultimo competencia, tur e 6 atleta di Aruba a ehecuta un rutina hopi creativo y a mustra un nivel tecnico cu ta pertenece den e topnan den e region Centroamericano y di Caribe. Cu e prestacion aki, atletanan di Aruba a logra un score di 142.1658 y obtene e medaya di brons.

   Cu e medaya aki, e ekipo di Natacion Artistico ta logra 7 medaya den 7 evento, unda a logra 2 medaya di plata y 5 di brons.

   Cu un ekipo cu a conta cu e atleta mas hoben di henter e wega cu Khloe Rafini di 14 aña, atletanan hoben Kendra Simon, MariaJose Salazar y Janneke Dirven y dos atleta di hopi experiencia den Nakaylee Didder y Kim Deiman, atletanan di Aruba a logra nan meta y a subi podium pa tur evento.

   Comite Olimpico Arubano (COA) ta sumamente orguyoso di e ekipo aki cu den un tempo corto a wordo forma y a traha hopi duro pa lunanan largo pa logra e bunita resultado aki pa nan mes y pa pais Aruba, pues pabien y danki.  Potretnan pa cortesia di Comite Olimpico Arubano.