Aruba a bolbe briya internacionalmente den Tang Soo Do

ORANJESTAD (AAN): Tang Soo Do ta un arte marcial cu a origina na Korea,

y ta basa riba influencianan di Okinawan Karate, tambe Taijiquan, y Shaolin Long Fist.  El a cuminza alrededor di añanan 1944 y a sigui crece te awe.

   Den fin di siman cu a pasa, Ministerio di Gerlien Croes a ricibi bishita di e atletanan di Team Aruba, kendenan a bay competi den Tang Soo Do na e asina yama ‘WTSDA World Championship 2026’ cu a tuma lugar na Chicago na Merca.

   E team di Aruba a regresa e isla cu un resultado impresionante di 10 medaya di oro, 6 medaya di plata, y 13 medaya di brons.

   E medayanan aki ta resultado di sacrificio, disciplina y compromiso cu excelencia. Cada combate y cada victoria a hiba e bandera di Aruba mas halto.

   Ministro Gerlien Croes a expresa palabranan di pabien na tur atleta, coach, voluntario y famia cu a contribui na e exito aki. Sigui inspira nos hobennan y sigui representa Aruba cu orguyo.  E potretnan aki pa cortesia di Ministerio di Deporte.