Aruba ta cla pa representa nos bandera den CFU U14 Challenge Series

ORANJESTAD (AAN): Diamars cu a pasa, desde oranan trempan di mainta, esta pa 4:45 am ora cu ainda tabata scur pafo,

e Seleccion di Futbol Nacional Aruba Boys U14 tabata presente na Aeropuerto, cla pa biaha pa Punta Cana, Republica Dominicana, pa representa Aruba den e CFU U14 Challenge Series.

   Cu 30 luna di preparacion, disciplina y sacrificio tras di lomba, Seleccion Nacional Aruba Boys U14 a sali pa Punta Cana cu un solo mision: Representa Aruba na e nivel mas halto.

   Esaki no ta simplemente un team. Esaki ta un seleccion U14  fuerte, prepara y prometedor cu Aruba ta manda pa un CFU Challenge Series. Un grupo cu talento, caracter, condicion y, mas importante, Hopi Motiva!

   Aruba lo competi den Tier 1, Grupo C contra tres rival fuerte:

Dialuna Aruba lo enfrenta Corsou pa 9:30 am.

Diamars Aruba lo enfrenta Jamaica pa 10:00 am.

Diaranson Aruba lo enfrenta St. Kitts & Nevis pa 1:30 pm.

   E muchanan aki a entrena pa e momento aki.  Nan a crece y Awor ta momento pa nan competi profesionalente y sigui desaroya. Esaki ta solamente e comienzo.

   Cada un di nan lo subi tereno cargando algo mucho mas grandi cu un uniform, nos bandera, y nos orguyo.

    Un reconocimiento grandi na e coachnan, organizacion, famianan y tur hende cu a para tras di e seleccion durante e largo proceso di preparacion.

   Seleccion di Aruba a train bao di AVB, Development Program TDS/FIFA, cu e headcoachnan Ferdinand Robert y Chris Beard.  E ta un academia cu despues ta evalua pa sigui e ora cu seleccion. 

   DIARIO ta desea e delegacion completo hopi exito. Semper apoyando hubentud den deporte.