Shardea Arias-Croes reconoci oficialmente como un 'World Para Athletics International Classifier Trainee'

ORANJESTAD (AAN):  Shardea Arias-Croes a wordo reconoci oficialmente como un "World Para Athletics (WPA) International Classifier Trainee."

Shardea ta solamente e di dos persona den Caribe cu a haya e logro aki.
            Esaki ta un logro hopi grandi, mirando cu deporte paralimpico no por existi sin clasificadornan. Tabatin 160 persona cu a aplica pa bira un WPA International Classifier. E grupo a baha di 160 pa 80 y despues pa 40 despues di varios workshops y evaluacionnan online den aña 2024 y e aña aki.

            Shardea ta forma parti di un grupo di 28 cu ta den e paso final pa bira un International Classifier Oficial despues di haci diferente cursonan online cu WPA, evaluacionnan online, y ayera a logra pasa su examen den persona na e prome WPA Grand Prix pa para atletanan femenino na Olomouc, Czech Republic.

            Despues di 6 dia intenso di workshop, completando un examen, y completando e parti practico di clasificacion, e la logra pasa tur test pa asina bira un international classifier trainee oficial di e World Para Athletics.

            Un clasificador internacional di WPA ta un experto cu ta evalua e debilidad di un atleta, sigurando cu e ta cumpli cu e criterionan minimo pa e deporte y despues determina e clasificacion di su deporte apropia a base di e grado di limitacion di actividad causa pa e discapacidad. E proceso aki ta garantisa competencia husto y igual door di agrupa para-atletanan cu limitacionnan di actividad similar hunto.

            Den e mundo Paralimpico, e ta esencial pa tin bon clasificadornan na un pais. Weganan Paralimpico no por existi sin clasifiers. Awe nos por ta orguyoso cu Aruba lo tin un di dos clasificadornan internacional di WPA den Caribe.