ORANJESTAD (AAN): Diamars y diaranson, 8 y 9 di juli, 2 team di seleccion di Pony 8U ta biaha pa Marion Illinois pa
representa Aruba na USA den e torneo 2025 Pinto 8U International Baseball Classic.
La Cabana ta e sponsor principal di Team Oranjestad, y diahuebs 3 di juli, Team Oranjestad a ricibi un di nan uniformnan oficial den e Ball Room di La Cabana.
Den un tempo cu ta dificil pa haya sponsor, La Cabana a acudi mesora na e peticion den gran forma, y cu e bunita uniform pinstripe, e team completo lo luci fabulosamente, mientras nan ta representa nan isla y nan bandera den e torneo aki. E ekipo completo ta sumamente gradici na La Cabana Beach Resort & Casino y La Cabana Aportando pa nan contribucion.
La Cabana a sorpresa e team cu nan invitado, sr. Rene Wild, kende a bin duna un charla cortico na e atletanan unda e la duna di conoce cu e tambe a cuminsa den e mundo di deporte hungando baseball.
E 10 peloteronan di U8 di Team Oranjestad, di grandi te chikito, ta: Nathan Maduro, Osdin Croes, Gerzion Gonzalez, Liam Ruiz, Rushen Faria, Omaric Andrade, Zhaèr Thompson, Eduard Flanegin, Aiden Rodriguez, y Axl Wester. E manager di e ekipo aki Edgar Flanegin, hunto cu coachnan Jair Thompson, Arsan Wester, y Imro Gonzalez, lo lucha pa hiba nos muchanan te final.
Ta desea e atletanan y coachnan hopi exito den exterior.
https://diario.aw/categories/noticia/deporte/bautismo-di-uniform-di-team-oranjestad#sigProId90d9881e1b
