Comite Olimpico Arubano cu directiva nobo pa 2025-2028

Cu bista riba e plan strategico pa e siguiente ciclo Olimpico

ORANJESTAD (AAN):  Diasabra ultimo durante asamblea general di Comite Olimpico Arubano a trata varios punto di agenda manera ta stipula den e statutonan di e asocacion. Entre otro a trata e actualisacion di e statutonan di COA cu a wordo aproba door di e federacionnan miembro y a ser manda pa Comite Olimpico Internacional pa asina percura cu ta cumpli cu tur rekisito na nivel internacional.

            Ademas di esaki, a trata e relato anual 2024, unda a presenta e relato financiero  y e relato di actividad cual ta splica tur cos cu COA a experiencia aña pasa. Importante pa remarca cu e relato financiero a wordo presenta door di Zarina Trimon di BDO, cu ta e compania di contabilidad di contabilidad cu ta traha riba e relato financiero. Esaki tambe a haya un aprobacion unanimo di tur federacionnan miembro presente.

E ultimo punto di agenda tabata e eleccion di directiva nobo pa COA. Manera ta costumber, cada 4 aña tin eleccion pa eligi e siguiente directiva cu lo maneha COA pa e ciclo Olimpico cu den e caso aki ta pa e ciclo 2025-2028.

 Previo na e eleccion, a conoce e retiro di dos miembro di e directiva saliente, unda a mira tesorera Juelle Thode y comisario Perlishka Lockhart tuma nan despedida di COA. Ambos a aporta grandemente na e desaroyo y progreso di COA y a gracidi nan pa e aporte brinda. Sinembargo, a presenta dos candidato nobo cu a postula nan mes pa kier forma parti di e directiva di COA. Aki a mira Marushka Lee Tromp cu lo bira miembro di e directiva como comisario y lo tin como areanan di interesa e parti di sostenibilidad (ESG) y bon gobernansa, ademas di promove e balornan Olimpico.

Marushka ta Secretaria General di UNESCO Aruba, unda su tareanan ta alinea cu esnan cu lo traha riba dje na COA. E siguiente tesorero di COA lo ta Marilyn Ellis, cu ta un profesional dinamico cu hopi conocimento y experticio den e mundo di finansas, maneho y educacion. Su profiel como profesional ta dune tur capacidad necesario pa por fungi como tesorero di COA y su experiencia lo brinda un perspectiva nobo pa asina por pensa riba nivel strategico na e desaroyo a plaso largo di maneho deportivo.

Despues cu ambos a keda unanimente eligi como miembro nobo di Directiva, a conoce e directiva di COA pa 2025-2028. E directiva aki lo tin como presidenta Wanda Broeksema, Secretaria General Nicole Hoevertsz, Vicepresidente Randall Van Trigt, Tesorero Marilyn Ellis, segundo Secretario General Maarten Willems, Comisario Marushka Lee Tromp y miembro Monica Pimentel cu ta forma parti di e directiva como Presidente di e comision di atleta.

 COA ta yama e dos profesionalnan cu a tuma e reto aki bonbini y ta cla pa traha na bienestar di deporte na Aruba.