Seleccion di Aruba a cuminsa CFU U14 cu empate

Competencianan na Punta Cana

ORANJESTAD (AAN): Na Punta Cana na Republica Dominicana ta tumando lugar actualmente e “2026 CFU U14 Challenge Series”.  Aruba tambe ta participando den e competencia aki di Caribbean Football Union.

   E Seleccion Aruba Boys U14 a habri su participacion cu un empate 1-1 contra Curaçao.

   Aruba a cuminsa fuerte y tabata domina e prome fase, creando algun bon oportunidad. Curaçao a habri e marcador despues di un error den area penal di Aruba.

   Aruba a responde rapido y a logra e empate via Tristen Vrolijk, cu a probecha di un rebote despues di un bon tiro riba gol.

   Den e di dos tempo, Aruba tabata e mihor ekipo y a busca e gol di victoria, pero a falta e acabada final. Un gol casi na final a wordo anula pa offside, laga e partido termina 1-1.

   Aruba ta bolbe na accion awe Diamars pa 10:00 am contra Jamaica den nan di dos partido.