Resumen di Aruba su team di Taekwondo na Jacksonville Florida

ORANJESTAD (AAN):  Den fin di siman a tuma luga e President's Cup na Jacksonville Florida. Aruba tabata tin 6 participante.

            Monica Pimentel a atende e technical meeting pa asina por a informa e atletanan di tur e reglamentonan cu a wordo aplica den e President's Cup.

            Jenniffer Baez a logra medaya di brons den Poomsea categoria di dames -40. Kianna Krosendijk no tabata tin e mesun suerte cu na Costa Rica unda cu Kianna Krosendijk a logra medaya di Brons.         

            Kianna Krosendijk a participa den e categoria di cadet -55 kilo y a topa cu Andrea Delgado di Puerto Rico cu a gana 2 di e 3 rond nan. Kianna Krosendijk kier a gradici tur hende cu a cumpra nan BBQ y seafood special y tambe tur automobilista cu a contribui. E ayudo aki a haci cu Aruba tabata bon representa na Jacksonville Florida.

            Jourde Klaber a topa cu Vicente Pizarro for di Chile cu a gana dos di e 3 rond nan. Joshua Klaber a gana e prome pelea 2-0 contra di Greg Jean-Baptiste di Haiti pa despues topa cu Melvy Alvarez di Merca. E biaha aki Melvy Alvarez tabata tin su man nan yen cu Joshua Klaber. Joshua Klaber a perde pa 1 punto contra di Melvy Alvarez pa straf punt.