Prome Minister a expresa palabranan di orguyo pa tur atleta y deportista nomina

Na apertura di entrega di Premio Excelencia den Deporte:

ORANJESTAD (AAN) – Un total di 141 nominado cu nan respectivo Federacion Deportivo, tabata presente den Renaissance Convention Center, durante e ceremonia di entrega di e premio “Excelencia den Deporte” 2019 y 2021.

Manera ta conoci, e atletanan cu a duna miho prestacion na aña 2019 mester a haya reconocimento na aña 2020 locual no a logra debi na e pandemia. Y esnan cu a destaca na 2020 y cu mester a wordo premia na 2021 a wordo reconoci dia 20 di Augustus ultimo, hunto cu esnan di aña 2019.

E acto ceremonial a cuminza cu entonacion di e Himno Nacional “Aruba Dushi Tera” y seguidamente, Minister Presidente Evelyn Wever-Croes, a hiba palabra.

Prome Minister a expresa cu pa su persona tabata un honor di ta presente, cu un sala yen di Atleta y Deportista, cu tin deporte den nan curazon. E dignatario a bisa cu pa Gobierno di Aruba un anochi manera esaki ta un anochi excepcional, specialmente despues di un pandemia cu a afecta henter Aruba, y sigur e sector di deporte, y mira kico tur cada un di e deportistanan a haci pa pone e cara do Aruba briya den exterior ta algo cu ta yene, sumamente, cu orguyo.

“Semper nos tabata sa cu cada deportista, cada mucha cu drenta den deporte, cu curazon den deporte nos ta kita un mucha mas di ta riba caya. Pero ya locual boso a haci den deporte, aki na Aruba, y varios di boso tambe den exterior ta yena nos tur, enormemente, di hopi orguyo”, e mandatario a expresa.

E evento di e anochi aki, el a bisa, ta para riba un simbolo di reconocemento, cada un atleta y hoben atleta, mayornan y esnan cu ta entrena nan, y esnan cu ta stimula e atletanan y hobennan atleta pa bay pa dilanti, y a gradici den nomber di Gobierno di Aruba, pa e trabao cu nan ta haciendo. El a gradici e Comision cu a organiza e evento aki, y specialmente su colega Endy Croes pa su vision y determinacion y su amor demostra pa deporte.