Premionan Individual di Copa Noord Heineken 2025

ORANJESTAD (AAN):  Copa Noord 2025 dedica na Johannes “Poy” Flanegin, Alvaro Barrios, Nel Frank y Francis Arcaya

a termina cu un broche de ora dia di Tata 15 di Juni ultimo na veld di Kudawecha. Royal Power Tat Fat Campeon invicto mientras Salbabo kendenan por mira atras riba un presentacion digno y formidabel den Copa Noord a bay cu e titulo di Sub Campeon. Despues di e promer set di Tsunami kendenan a presenta y sacudi Kudawecha cu un artista international Skinny Banton, Comision Organisador di SV Royal Power Tat Fat Copa Noord 2025 a bay over na e parti protocol pa entrega premio na ekiponan ganador y reparti premionan individual. 

Premionan individual di Copa Noord 2025

            MVP di e torneo ta wordo saca for di e ultimo wega pero alabes ta mira tambe  e crusenan di diasabra, semi final pero sigur e peso mas grandi ta wordo poni riba e wega final. Pues bo mester hunga final y gana e wega final pa por ricibi e premio maximo como MVP. Jomark Flanegin desde diasabra tabata redhot conectando su propio Tata Poy Flanegin un homerun pa knock out Super Plus mandano nan cas. Diadomimgo Jomark a destaca den semi final merdia y atardi Jomark a pitcha 7 inning alabes a bati tremendo cargando su ekipo pa e titulo maximo.

            Unanimamente cu 7 voto na fabor di e Comision cu ta duna conseho pa premio individual Jomark Flanegin ta conkista e premio di MVP “Most Valuable Player” di Copa Noord 2025. Champion Batter, Champion Pitcher y Champion Homerun ta wordo saca for di e promer buelta esta e promer ronda. Champion Batter a resulta Marcel Duran di Super Plus kende a bati di 8-6 pa un averahe di 750. Un hungador tabata tin mester di “minimo” 8 turno esta 8 “plate appearance” pa por participa pa e premio aki.  Marcel Duran di Super Plus merecidamente a bay cu e titulo aki.

            Champion Pitcher a bay pa Rodney Kelly di Calabas Blue Jays. Rodney Kelly tabata e unico pitcher cu un record di 2-0 den e promer buelta y asina a seya e titulo riba su nomber. Champion Homerun of Homerun King  a bay pa “Camala” Alexander Groeneveldt di Stingers. Stingers un ekipo nobo den Copa Noord cu a sa di luci yegando te semi final  y su hungador ta logra un titulo individual. A hunga cu un bala 0.44 COR y organisadornan a pone batenan disponibel pa e torneo. No tabata facil pa saca e bala pafor di parke.

            Den e promer buelta “Camala” Alexander Groeneveldt tabata e unico hungador cu a logra saca e bala for di parke den deep centerleft y asina ta ricibi su premio di Champion Homerun merecidamente.            Comision Organisador SV Royal Power  Copa Noord 2025 ta felicita tur atletanan kendenan a ricibi un premio individual. Masha masha pabien. Sigui traha duro pa boso destaca otro aña 2026 un biaha mas den Copa Noord 2026 cu lo wordo organisa pa Calabas Blue Jays. Masha Masha Pabien.