Futbol ta nan pasion, progreso ta nan mision
ORANJESTAD (AAN): Aki ta presenta oficialmente e team cu lo participa den Eleccion di Arubaanse Voetbal Bond (AVB) 2025.
Un team nobo, dinamico y diversifica cu tin un pasion pa e comunidad di futbol local. Hunto como un team uni y cu experticio den diferente areanan, nan lo traha pa e progreso di Aruba su Futbol y haciel’e nan mision.
Nan vision: Union, positivismo, inclusion, experticio y determinacion pa eleva futbol di Aruba.
Nan ta representa transparencia, desaroyo sostenibel, y integracion total di comunidad den tur nivel di futbol.
Nan compromiso: Esaki ta encera e.o. (*) Inverti den desaroyo y profesion di Referee. (*) Fortifica futbol hubenil. (*) Eleva futbol femenino. (*) Promove transparencia y bon gobernacion. (*) Avansa e nivel competitivo y profesional di Aruba su futbol. (*) Stimula maneho financiero responsabel y sostenibel. (*) Proyecto Futbol na Scol pa inspira e generacion siguiente. (*) Proyecto “Safe guarding & Discrimination Policy”. (*) Cuminza Proyecto Turf; plania, ehecuta y monitoria. (*) Establece TC na club pa evalua rekesito di club licensing. Y hopi mas!
Cera conoci cu e team: President ta Randolf Lacle. Randolf ta conoci den e mundo di futbol. Tin un desaroyo profesional den futbol local y internacional, Randolf a sirbi como Presidente actual di AVB, y anteriormente como Vice-Presidente, General Secretary y Competitions Manager. Su experiencia como Match Coordinator pa CONCACAF y FIFA hunto cu su network global, ta pone su liderazgo na un nivel halto. Cu hopi aña den mundo di futbol, su mision ta pa educa un grupo hoben profesional y comparti su experticio pa asina crea un grupo ehecutivo pa proximo generacion.
Dyane Wiersma - Vice Presidente: Dyane ta un pionera den futbol femenino na Aruba. Cu un titulo di International Business Management, y un carera dedica na educacion y futbol. Despues di a fungi como Secretario General, Dyane tin un conocemento amplio den organizacion interno di AVB. Ademas, e tin un conocemento profundo den proyectonan di FIFA despues di a fungi como FIFA forward coordinator di AVB. Dyane den pasado a forma parti di seleccion femenino como hungador y despues a fungi como Women’s Football Coordinator y Team Manager pa e seleccion femenino pa varios aña. Dyane kier motiva cambionan structural y empodera deporte di futbol den comunidad di Aruba.
Hubert Solagnier – Miembro EXCO: Cu un fondo fuerte den Educacion Fisico y Sport Management, Hubert a ocupa e posicion di Secretario General di AVB y a sirbi como docente y decano na Maria College Mavo. Su experiencia riba tereno tecnico, administrativo y su involucracion den AVB, FFD y ASU ta refleha su compromiso profundo cu futbol y mundo di deporte en general.
Jermaine Molina – Miembro EXCO: Un experto den e mundo bancario, Jermaine ta un Analista Financiero cu a participa den futbol competitivo. Sigur un pilar importante pa Federacion cu ta ricibi fondo y mester cumpli cu varios exigencia di FIFA. Jermaine a forma parti di e Kascommisie di AVB, dirigente den pasado di S.V. Unistars y a bisti e camiseta di Seleccion U-20. Su enfoke ta na progreso structural y transparencia.
Rudselyne de Kort – Miembro EXCO: Cu un Master den Ley y Bachelor den Business Administration y fondo den contabilidad y derecho, Rudselyne ta un abogado activo y lider comunitario. Su experiencia den deporte y ley coperativo ta un combinacion poderoso pa promove justicia, integridad y orden den e federacion. Rudselyn ta comparti su pasion den futbol como lider di U5 San Luis.
Michelle Every – Miembro EXCO: Cu 7 aña di experiencia den Digital Marketing y actualmente den su ultimo aña na Universidad di Aruba studiando Organization, Governance & Management, Michelle tin un base fuerte den conocemento den con sistemanan organizatorio ta hinca den otro y con pa mehora esaki cu bon comunicacion, marketing, y cu beleidnan bon elabora. Como miembro di board, su meta ta pa mehora e comunicacion di AVB, fortalece relacionnan cu stakeholders y promove inclusion den Aruba su comunidad di futbol. Michelle a forma parti den pasado cu Aruba su Seleccion Femenino como Conditie Trainer.
Shemuel Koolman – Miembro EXCO: Shemuel ta un profesional den hoteleria cu experiencia managerial den hotelnan di nivel mundial. Den pasado a forma parti como hungador den S.V. Dakota y e seleccion nacional di Aruba, alavez Shemuel a fungi den pasado como referee local/prospect FIFA. Hunto cu su pasion pa futbol y su habilidadnan fuerte gerencial e kier trece cambionan necesario pa cu nos refereenan local. Shemuel ta trece su experticio caminda lo bay traha riba un plan strategico pa crea un caminda di desaroyo pa recruit mas referee, retene refereenan actual pero tambe educa e comunidad riba e importancia di referee den nos futbol local.
Nan ta yama comunidad di futbol di Aruba pa uni hunto cu un team dinamico, diversifica, inovativo cu ta carga e pasion pa futbol y kier traha pa progreso di futbol na Aruba. Hunto por crea un AVB moderno, uni, transparente, capas y inclusivo.
