‘Hunga baseball ta yudabo desaroya bo curpa, haya forsa y haya amigonan nobo’

Antoine Croes:

ORANJESTAD(AAN): RBC Royal Bank un biaha mas ta e patrocinador principal di Aruba Little League y durante un conferencia di prensa Rudy Donata, District Administrator di Aruba Little League a hiba palabra y a bisa cu Aruba Little League ta hopi contento mescos cu tur e mayornan, cu un biaha mas RBC ta yuda e muchanan.

“Sin e muchanan, e coachnan, managers y mayornan no tin baseball y sin sponsor ta bira hopi mas dificil pa nos hunga bala”.

Ta mas cu 20 aña caba cu RBC ta sponsor nos muchanan y nos ta sumamente contento cu esaki, segun Donata.

Karel ‘Cai Cai’ Willems, Assistant District Administrator tambe a papia durante e conferencia di prensa y e tambe a gradici RBC pa tur e añanan cu a yuda Little League di Aruba.

“Nos kier duna un danki hopi grandi mes tambe na e mayornan cu den tur situacion toch ta trece e muchanan pa veld y ta yuda den hopi di e aspectonan rond di e biahenan, e weganan y e trainingnan”.

Nos ta bisa danki tambe na e dirigentenan, pasobra sin dirigente bo no por tin team.

Ta trata di dirigentenan cu aña aden aña afo, rabia of no, toch ta bin bek pa dedica nan tempo na yiu di otro hende, segun Willems.

El a gradici tambe prensa cu ta aporta y ta importante pa stimula y apoya nos muchanan.

Max Arends, kende tabata un di e coachnan di e seleccion di Little League cu a participa na e World Series na Williamsport aña pasa a trece dilanti cu e ta hopi contento cu RBC por yuda e muchanan, mirando con bunita e programa ta pa e muchanan ora cu nan yega leu den deporte.

Un di e hungadornan, Antoine Croes, tambe a wordo pidi pa expresa algun palabra durante e conferencia di prensa Diahuebs y el a bisa cu hunto cu su team e experiencia na Williamsport tabata algo unico.

E tambe a gradici e banco y el a indica cu tabata great pa wak e atencion cu e World Series a haya, incluyendo e hecho cu tur caminda ESPN tabata presente.

DIARIO a puntra Antoine kico e ta conseha muchanan cu no ta hunga baseball of ningun otro deporte.

“Deporte ta yudabo desaroya bo curpa, build up, baha peso, haya forsa y desaroya bo talentonan”.

Banda di esaki bo ta haya hopi amigo nobo, segun Antoine.