Ministro Endy Croes a reuni cu Sidney Ponson Charity Foundation

ORANJESTAD (AAN): Diadomingo ultimo den un atmosfera ameno Minister di Enseñanza y Deporte Endy Croes, a reuni cu e conoci pelotero di Grandes Ligas Sidney Ponson di Sidney Ponson Charity Foundation, presente na e reunion aki tambe Milton Croes y Carl Michael Bikker.

   E mandatario tin un solo meta, pa mehora enseñanza y deporte. Durante e reunion a comparti vision, plannan y a intercambia pensamento riba diferente proyecto pa mehora e deporte na Aruba.

   E reunion a bay den un bon ambiente, a elabora riba e proyecto grandi na Bubali cu  Sidney Ponson Charity Foundation tin pa nos muchanan y hobennan. Tambe a elabora riba e Wahoo Shootout cu lo tuma luga dia 4 di December benidero. E mandatario a elabora riba proyectonan y varios punto di competencia internacional di baseball, softball y competencia escolar. A compromete pa traha hunto na bienestar general y creando oportunidad pa nos atletanan.

   Sidney Ponson Charity Foundation a expresa di ta sumamente contento cu Minister Endy Croes a mustra gratitud y sosten pa yuda cu e evento y proyectonan na caminda.

   “Ministerio di Deporte y Sidney Ponson Charity Foundation ta dispuesto pa traha hunto pa un solo meta mehora e deporte den su totalidad”, e mandatario a enfatisa.  E Mandatario a expresa cu deporte ta un vehiculo cu ta conduci nos riba e bon caminda den bida nos mester motiva y yuda nos deportistanan sigui crece y sigui desaroya.