Minister Endy Croes a haci entrega di premio na ganadornan di landamento

ORANJESTAD (AAN) - Diadomingo den ora di mainta Minister di Enseñansa y Deporte sr. Endy Croes tabata presente na Commandeurs Bay

na Savaneta pa e competencia di landamento abierto di Aruba Dolphins Swimming.

Despues di un discurso e mandatario a haci entrega di premionan na e landadornan Bobby Gibson, Braynsly Dirksz y Anezka Tromp. Un total di 124 atleta a landa riba distancianan di 1km, 3km of 5km. Mester remarca cu pa prome biaha e atleta femenino Britta Schwengle a haci un “time trail” di 10km esaki como preparacion pa un competencia Panamericano cu lo tuma luga na luna di October 2022.

Minister Endy Croes kier a felicita tur e landadornan cu a haci e competencia di landamento abierto uno sumamente exitoso. Un pabien tambe na Aruba Dolphins Swimming, mayornan y boluntarionan pa organisa un competencia hopi special pa nos landadornan.