Minister di Deporte ta felicita tur scol y hoben cu a participa den basketball escolar

ORANJESTAD (AAN):  Diabierna ultimo Minister Endy Croes tabata na YMCA na Dakota p’e final di basketball escolar pa scol avansa.

E competencia di basketball ta un di e actividadnan cu IBiSA ta organisa durante aña pa nos hobennan y siman pasa a tuma luga final den diferente disciplina.     Resultado di e torneo di basketball ta lo siguiente na di tercer luga a keda Maria College, sub campeon ta Colegio Nigel Matthew y e ganado absoluto di e torneo di basketball ta San Augustin College.

            Minister Endy Croes ta gradici IBiSA p’e invitacion. Alabes ta felicita tur e scolnan y nos hobennan cu a participa y haci e torneo uno exitoso. Tambe e mandatario ta gradici e mayornan cu ta apoya nan yiunan y duna nan e sosten pa por practica deporte.

            Pa finalisa e Minister Endy Croes a duna palabra di danki n’e ekipo di IBiSA, referee y e boluntarionan cu ta traha cu amor y pasion pa deporte. IBISA y deporte den su totalidad por conta cu sosten di Ministerio di Deporte. Masha pabien n’e ekiponan ganado.