Ministro Endy Croes a reuni cu Gregory Oduber y Jessy Beukenboom

ORANJESTAD (AAN): Siman pasa Minister di Enseñansa y Deporte Endy Croes a continua cu reunionnan riba tereno di deporte, Minister Endy Croes a combersa cu representantenan di Aruba Boxing Commission, sr. Gregory Oduber y sr. Jessy Beukenboom.

   Un bon reunion unda a papia di diferente topico manera; miembronan adicional cu Minster Endy Croes lo mester nombra den dicho comision. E Mandatario tin e autoridad pa nombra e demas miembronan pa completa e directiva. Tambe a worde treci pa dilanti cu normalmente tur organizado di boxeo internacional / profesional mester haya un licencia cu condicionan di Aruba Boxing Commission prome cu nan organiza cualkier evento. 

   Den e cuadro aki tambe Aruba Boxing Commission a expresa e deseo pa regalmenta e supervision riba e peleanan di MMA. Minister na su turno ta encarga pa por duna contenido na dicho deseo. Alavez Aruba Boxing Commission ta expresa nan deseo pa organiza curso pa referee y ‘ring officials’ cual ta resorta bou di nan. Tambe a expresa e deseo pa tene un ‘convention’ di World Boxing Organization ‘WBO’ na Aruba na aña 2023.

   ‘Nos por wak atras riba un reunion fructifero cu e respresentantenan activo di Aruba Boxing Commission’, e Mandatario a finalisa.