Torneo di domino Nos cu Nos Diadomingo

ORANJESTAD (AAN) - Mañan Diadomingo cuminsando pa 1’or di merdia, e famoso torneo di tur aña titula “Nos cu Nos”

lo tuma lugar na Domino Square Garden na Calabas. Si shonnan amante di ‘top class’ domino, e aña aki atrobe torneo “Nos cu Nos” ta priminti di bira un ‘action packed thriller’ mescos cu semper.

Lamentablemente, no tur hungado di antaño lo por ta cu nan ya cu desafortunadamente tin cu a bay laga nan door di pandemia of otro motibo, pero den nan honor y felis memoria, “Nos cu Nos” lo sa di honra nan.

E aña aki atrobe por conta cu e ‘djacanan di caña’ di semper manera Salomon ‘man got to go’, Osbaldo Croes, Lucas ‘Cross’, e capo di tutti capo Don Chicho Erasmus, Ronald ‘Hollandse Nieuwe’, Licenciado Jem Croes, Dokter Tico Dirksz, ‘Zware Jongen’ Yoyo y varios mas; sinembargo, pocopoco  a ripara cu tin un ‘gang’ nobo a infiltra e conocido Domino Square Garden manera Dr. Sneek, Sunny, Sero Blanco Boys, ‘Snor’ Perez, y hopi ‘expertonan internacional’ den mundo di domino cu a sali ariba potret den revista ‘Domino Illustrated’! Shonnan, e cos aki ta priminti di ta un diadomingo di ‘climate change’ ora e generacion di antes bruha tera cu e ‘millenials’ nan di awendia! No lubida, mañan cuminsando pa 1 or di merdia, e candeloso torneo pa clausura aña “Nos cu Nos” ta on.