Marcelo Gonzalvo Croes honra como Baluarte Deportivo 2022

ORANJESTAD (AAN): Durante e ceremonia di Premio Excelencia den Deporte 2022,

a duna homenahe na algun baluarte den deporte cu a contribui grandemente den e desaroyo di deporte di Aruba.

   Sr. Marcelo Gonzalvo Croes ta un di e baluartenan cu a ricibi reconocemento durante e gran evento deportivo aki. Durante e ceremonia di Premio Excelencia den Deporte 2022,  Prome Minister Evelyn Wever-Croes a haci entrega di e plakkaat na Sr. Marcelo Gonzalvo Croes.

   Sr.  Marcelo Gonzalvo Croes a nace na Aruba dia 16 di januari 1951. Sr. Croes tabata meneer di scol na John F. Kennedy Education Center Aruba (JFK). Actualmente, Sr. Croes ta docente di electro na E.P.B. Oranjestad. For di mucha Sr. Croes tabata gusta futbol y a forma parti di ekipo di S.V. Brazil Juniors pa un periodo di 3 aña. Despues di su estudio na Hulanda, Sr. Croes a regresa Aruba y semper tabatin e deseo di yuda cu e disciplina di futbol. Na aña 1990 Sr. Marcelo Croes a bira presidente di S.V. Brazil Juniors Un funcion cu Sr. Croes a eherece pa 25 aña.

   Durante e temporada ey Sr. Croes a ocupa e funcion di miembro di directiva como tesorero di AVB pa un periodo di 4 aña. Pa dies aña Sr. Croes a fungi como referee pa tur division di futbol. Tambe, Sr. Croes a duna curso di referee na Curaçao.  Adicionalmente, Sr. Croes a representa AVB den e directiva di ASU. Mester agrega cu pa hopi aña Sr. Croes tabata miembro di LIFIDA y tabata encarga pa traha schedule di futbol di LIFIDA.

   Na aña 2015, despues di 25 aña Sr. Croes a entrega e presidencia di S.V. Brazil Juniors na un otro persona. Desde tempo ey te cu awo Sr. Croes ta fungi como presidente di strafcommissie di AVB. Minister Endy Croes ta felicita Sr. Marcelo Gonzalvo Croes cu su reconocemento y ta gradicie pa contribui den e desaroyo di deporte di Aruba.